Paaqqinniffimmik isornartorsiuineq: Najugaqartut tamulugassaannik, cigaretinik mobilinillu arsaarneqartussaanngitsut

Ilulissani paaqqinnittarfik Ikinngut, najugaqartunut eqqarsartaatsimikkut timikkulluunniit innarluutilinnik 20-nut inissalik, Inatsisartut ombudsmandianit misissuiartortunit marsip naalernerani siusinaarluni nalunaarutigisamik misissuiartorfigineqarpoq,

Ikinngut najugaqartunut ininik kusanartunik ipiitsunillu neqerooruteqartoq kiisalu sulisut najugaqartunik isumassuillaqqissuusut tusarnaallaqqissuullutillu, ombudsmandip pingaarnertut paasivaa.

Sulisut najugaqartut tamulugassaataat (snacks), mamakujuutaat, sodavandiutaat, cigaretsiutaat, oqarasuaataat angallattakkat, iPadii, immiisaat toqqoraangatigit nammineq aalajangiisinnaatitaanerannik killiliisartut, nalunaarusiami inerniliussamik allaqqavoq.

Najugaqartullu oqarasuaatiminnik angallattakkanik qaqugukkut atuisinnaanerat, cigaretsinik ullormut qanoq amerlatigisunik pujortarsinnaanerat kiisalu tamulugassaatiminnik qaqugukkut tamulussinnaanerat sulisut killilersuiffigigai.

Sininnissaq imaluunniit nerinissaq puigortaraat

Taamatut aaqqiissuteqartarneq najugaqartunut ataasiakkaanut atuuttoq, sulisut misissuisoqarnerani itisiliipput. Taakku mobilitik imaluunniit iPaditik nassaraangamikkit unnuakkut sininnaveersinnaasarput, imaluunniit ullut ingerlanerani nerinngitsoorsinnaasarput, mobiliminnut imaluunniit iPadiminnut tiguarteqqasaramik.

Taamatut aaqqiissuteqarnermi najugaqartut akuersillutik nalunaarummik atsiortussaapput, taamaakkaluartoq najugaqartut assersuutigalugu suliartuleraangamik mobilitik nassarusuttaraat ombudsmandip paasivaa.

- najugaqartut namminneq aalajangiisinnaatitaanerannut sakkortuumik akuliunnerusut, aaqqissuussaanermullu tunngasunik taaneqartartunik tunngaveqarsinnaanngitsut ombudsmandip nalilerpaa, ombudsmandi taama isornartorsiuivoq.

Ullormut marloriarluni pissaanermik atuisarneq

Ulloq unnuarlu paaqqinnittarfimmi misissuisoqarnerata kingorna arlaleriarluni najugaqartunut pissaanermik atuisoqartarnera allaaserineqarpoq.

Ilaatigut najugaqartoq niuertarfimmi bamsiserusussimasoq. Sulisup najugaqartoq oqarfigisimavaa bamsisinissaminut akissaqanngitsoq. Najugaqartup tamanna kamaatigisimavaa, sulisullu najugaqartoq taliatigut tigullugu niuertarfimmit aneqatigisariaqarsimallugu. Assersuutit allat ilagaat najugaqartut mobilimik tunniussiumanngikkaangata sulisut arsaarinnittarnerat.

Sapaatip-akunneranut najugaqartunut marluk tikillugit amerlassuseqartunik pissaanermik atuisoqartartoq sulisut ilaata oqaatigaa. Sulisut arlallit taamatut oqaaseqarput, naak aqutsisoqatigiit allatut isumaqaraluartut.

- Pisortaqatigiit misissuinermi itisiliillutik oqaatigaat najugaqartunut pissaanermik pinngitsaaliinermilluunniit atuisoqartannginnissaa suliniutigineqartoq kiisalu najugaqartunut pissaanermik atuineq ataatsimut isigalugu pisariaqartinneqanngitsoq. Paasisara unaavoq Ikinngut najugaqartunut pissaanermik atuisarneq pillugu allassimasunik tunaartarisassaqanngitsoq, ombudsmandi taama isornartorsiuivoq.

Inatsimmut ilisimasaqannginneq

Ulloq unnuarlu paaqqinnittarfimmi pissaarnermik atuisarneq pillugu inatsimmik ilisimasaqartoqannginneranik paasisaqarnera siulliunngilaq.

Ilaatigut Sisimiuni utoqqaat illuat najugaqartunut pissaanermik atuinermik nalunaarsuisannginnerannik sakkortuumik ombudsmandip isornartorsiornikuuaa.

Najugaqartunut pissaanermik atuinnginnissaq pinngitsoorneqarsinnaannginnera paasineqartoq, ombudsmandip oqaatigaa, tamannali najugaqartut inatsisitigut innarlitsaalineqarnerat eqqarsaatigalugu aamma inatsisit sinaakkutaasut kommunalbestyrelsimit akuerseqqaarnissamik pisariaqartitsisut eqqarsaatigalugit pisartussaavoq. Pissaanermik atuinerit arlallit nalunaarutigineqarsimanngillat imaluunniit akuersissutigineqaqqaarsimanatik.

- Inassutigaara sulisut tamarmik pissaanermik atuisarneq pillugu inatsimmi malittarisassanik pisariaqarneratut ilisimasaqalersinneqarnissaat Ikinngutip suliniutigissagaa, ombudsmandi