Paamiuni utoqqaat illuat nutaaq

Paaqqutarisarialinnut inissiat nutaaliat 24-t, taakkunannga puigortunngornermik eqqugaasimasunut inissat arfineq-pingasut, taakkuupput Paamiuni utoqqarnut ukiut pingasut missaat qaangiuppata atugassarititaalerumaartut, Kommuneqarfik Sermersooq ilisimatitsivoq.

Aserfallassimasoq
Paamiuni utoqqaat illuat maanna atorneqartoq aserfallassimaqaaq. Taamaattumik illoqarfimmi utoqqaat illutaartinneqassapput, 2016-imilu sanaartorneq aallartissalluni.

Utoqqaat illussaat illoqarfiup qeqqani napparsimmaviup sanerpiaani inissisimassaaq, sanaartornermullu atatillugu illorsuit taakkua marluk akornanni torsuusarsuarmik ataasiulersitsisussamik pilersitsisoqassalluni.

Inissat amerlanerusut
- Paamiuni utoqqaat illuat ullutsinnut naleqqussagaq qilanaarineqassaaq. Sanaartugaq nutaaq atuleriarpat pitsaassuseq qaffanneqassaaq aamma paaqqutarisarialinnut inissat amerlissapput, utoqqaat paaqqutarisariallit amerliartornerannut pisariaqartitsinermut naapertuuttumik. Aamma qilanaarutigaara utoqqaat illussaanni nutaami puigortunngornermik eqqugaasimasut immikkoortortaannik pilersitsisoqarnissaa, Isumaginninnermut, Suliffeqarnermut Inuussutissarsiornermullu Ataatsimiititami siulittaasoq Malene Lynge (IA), tusagassiorfinnut nalunaarummi oqarpoq.

Utoqqaat illussaat aningaasaliiffigineqareersoq pingasunik quleriiulluni sananeqassaaq. Ulluunerani najortagaq sammisassaqartitsivillu inini allerniissapput.

Quleriit pingasut
Inini qiterlerni qullernilu paaqqutarisariallit inaat aqqaneq-marluk inissisimassapput. Kiisalu qalia pequusivittut atussaaq napparsimmaviup utoqqaat illuatalu errorsisarfik igaffillu ataatsimoorussarissavaat.

Suliassamut tassunga 8,5 millioner koruunit 2016-imi atorneqartussatut illuartinneqarput. Utoqqaat Illuat nutaaq Kommuneqarfik Seermersuumut 53 millioner koruuninik akeqassaaq, taakkua affaat Namminersorlutik Oqartussanit aningaasalerneqassallutik.

Sanaartukkap 2018-ip naanerani atorneqarsinnaalernissaa Kommuneqarfik Sermersuumit naatsorsuutigineqarpoq.