Paamiuni ikuallattoqarnerani inuit pingasut ajunaartut

Ataasinngornerup marlunngornerullu akornanni unnuakkut Paamiuni inissiaqarfimmi minnerumaami ikuallattoqarnerani inuit pingasut ajunaarput. Arlallit ajoqusersimapput politiillu maanna teknikkikkut misissuinernik suliaqaleruttorput.

Ataasinngornerup marlunngornerullu akornanni unnuakkut nal 02.26 politiini pigaartut Paamiuni inissiaqarfimmi marlunnik quleriilimmi sisamanillu inissiartaqartumi ikuallattoqarneranik nalunaarfigineqarput.

Inuit pingasut ajunaarsimapput politiillu maanna ilaqutaasunut ilisimatitsiortuleruttorput. Arlallit annertuumik ajoqusersimapput, politiilli qassiunerannik qanorlu annertutigisumik ajoqusersimanerannik suli tamakkiisumik paasissutissaateqanngillat. Taama pigaartut pisortaat Aqqaluk Petersen Sermitsiaq.AG-mut paasissutissiivoq.

Ikuallanneq inissiat ilaanni pilersimavoq imalu sakkortutigisimalluni, inuit arlallit igalaakkut pissillutik qimaasariaqarsimallutik pissinnerminnilu ajoqusersimallutik.

- Politiinik Paamiunut aallartitsivugut paasiniaanermi ikiuuttussanik, aamma Danmarkimit ikuallattoqarnerani teknikerinik paasiniaasartunik nakorsamillu toqusut timaannik misissuisartumik ikiortissarsiortoqarpoq, Aqqaluk Petersen paasissutissiivoq.

Powered by Labrador CMS