Paamiuni angut siorasaarillunilu aallaasersortoq
Paamiuni sissap eqqaani aallaasersortoqarpoq arfininngornerup unnukkuani. Aallaasersortoq politiini atorfeqanngitsumit tigusarineqarpoq. Pisumi inunnik ajoqqusertoqanngilaq.
Paamiuni sissap eqqaani aallaasersortoqarneranik politiit nalunaarfigineqarput nalunaaqutaq 18.13 ippassaq arfininngornermi.
Angut siorasaarivoq timmiarsiutaagunartumillu seqqoqattaarluni.
- Politiit ornigummata angut pasineqartoq aalisartut atortuusivianniippoq, neqitsersuisarfimmi. Nilliaqattaarpoq siorasaaraluni. Paamiuni politiit Nuummi politiinik oqaloqateqarnerisa nalaanni aamma seqqorpallattoqartoq tusaaneqarpoq, politiinit Johan Westen Sermitsiaq.AG-mut oqarpoq.
Aallaasersortup allamut ingerlaqqinnginnissaa politiinit qulakkeerneqarpoq, pisoq nakkutigeqqissaarneqarluni.
Immikkut ilinniarsimasut
Politiit pisuni imaattuni immikkut ilinniarsimasut Nuummit Paamiuliartinneqarnissaat aalajangerneqarpoq.
- Paamiunili pujornera pissutaalluni qulimiguulimmik Paamiuliartinneqarsinnaasimanngillat. Taamaattumik Issittumi Sakkutuut saaffigineqarput, umiarsuarmik Knud Rasmussenimik aallarput nalunaaquttap 22.00-ip missaani, Johan Westen oqarpoq.
Tigusarineqarpoq
Politiilli innersuussutiginngisaannik pisoqarpoq. Innuttaasoq politiini atorfeqanngitsoq neqitsersuisarfimmut nammineerluni iserpoq, angut aallaasersortoq tigusaralugu.
- Nalunaaquttap 00.28-ip missaani politiini atorfeqanngitsoq nammineerluni, politiinit innersuussutaasut malinnagit illuaqqamut iserpoq angut aalakoornartunik imigassartutorsimasoq tigusaralugu. Tassanngaannit anillammata politiit angut aallaasersortoq tigusarineqarpoq, oqaluttuarpoq.
- Oqaatigerusuppara, politiinit innersuussutigineqartut innuttaasunit ataqqineqartassammata. Politiini atorfeqanngitsut namminneerlutik tigusarisaqartarnerat navianartuuvoq, politiit suliaannut akornutaasinnaavoq, tigusarinnittorlu imminut navianartorsiortippoq. Taamaattumik politiit innersuussutaat tamarmik innuttaasunit malinneqartarnissaat kaammattuutigaara, Johan Westen oqarpoq.
Pisumi inunnik ajoqqusertoqanngilaq.