Paamiuni ajunaartut eqqaaniarlugit innuttaasut naapeqatigiiittut
Paamiuni ataasinngornerup marlunngornerullu akornanni unnuakkut ikuallattoqarnerani inuit pingasut ajunaartut eqqaaniarlugit, Paamiuni Nuummilu innuttaasut marlunngornermi unnukkut arfineq-pingasunut naapeqatigiipput
Ukiaanerani anorlertoq silalu nillertoq inuit 150-it missaanniittut Nuummi inuit katerittarfianni marlunngormat unnukkut naapeqatigiipput, Paamiuni ataasinngornerup marlunngornerullu akornanni unnuakkut ikuattoqarnerani inuit pingasut ajunaartut eqqaaniarlugit.
Jakob-Peter Berthelsen tamatumannga aaqqissuussisimavoq, taassuma Paamiuni innuttaasut illoqarfinni marluusuni taakkunani ataatsimoorluni eqqaaniaasoqarnissaanik innuttaasunut kaammattuutaat takusimallugu taamatut iliortoqarnissaa aaqqissuussimavaa.
- Facebookikkut tamatumunnga tunngatillugu apeqquteqartoqarsimasoq takuara, nalunaaquttallu akunnerini siullerni akissuteqartoqanngimmat, taamaaliorniarlunga eqqarsarsimavunga, taanna oqaluttuarpoq.
Jakob-Peter Berthelsen politiinut saaffiginnissimavoq, taamatullu aaqqissuussinissamut akuerineqarami taallat marluk pappialamut naqitanngorlugit aniseriarlugit inunnut takkuttunut agguassimavai.
Paamiuni eqqaaniaajartortorpassuit
Paamiuni eqqaaniaanissaq palasimit Louis Sigurdsenimit aaqqissuunneqarsimavoq. Taassuma oqaluttuaraa, aaqqissuussinermut inuppassuit takkussimaut. Sermitsiaq.AG-p paasissutissaatai naapertorlugit, inuit 1200-300-tut amerlatigisut takkussimapput.
Sumiiffinni taakkunani marluusuni tussiutit Guutiga illimmi aamma Nersortigu takkuttunit atorneqarsimapput, ataatsimoorlunilu ataatarpunaartoqarsimalluni. Tamannalu Nuummi aaqqissuisumut killitsinnarsimaqaaq.
- Ajunaartoqarneranut attortissimaqaanga, Paamiuneersuungamalu toqusut kikkuusut nalunngilakka, Jakob-Peter Berthelsen oqaluttuarpoq.
- Aliasunnermi ataatsimoorluni eqqaaniaaneq oqiliallannarpoq, taanna oqarpoq.
Nuummi aaqqissuussami, illoqarfimmi siulersuisuni ilaasortaq Thiiooq Knudsen, aamma Paamiuninngaanneersoq naatsumik oqaaseqarpoq.