Otto Steenholdt toquvoq

Atassummi qinikkatut sulisimasoq Otto Steenholdt toqukkut qimaguppoq.

Taanna septembarip 27-anni 80-inik ukioqalerpoq.

Sisamanngornermi ullaap tungaani politikeri eqqaaniarlugu Inatsisartut minutsimi ataatsimi nipaallisimapput.

Taassuma nuliani Hanne, ukioq manna 50-iliilluni katiffissioqatigisani, kiisalu ernini marluk aamma ernuttani tallimat qimatarai.

Atuaruk: Otto aamma Hanne Steenholdt ukiunik 50-iliillutik katiffissiortut

Atassut
Otto Steenholdt Qeqertarsuatsiami Aasiaat eqqaaani inunngorsimavoq, Vodingborgimilu ilinniartitsisutut ilinniarsimavoq, kisianni politikkikkut atuuffeqarnera inuunerani malunnaateqarsimavoq.

Taanna 1971-imi Nunatsinni Landsrådinut qinigaavoq, 1976-imilu partii Atassut pilersitseqataaffigaa, Siumumut oqimaaloqutsiutitut inissillutik.

Ukiut 22-t Folketingimi
Ukiup tulliani Folketingimut qinigaavoq, tassanilu ukiut 22-t ilaasortaanermini kalaallini politikerini sivisunerpaamik ilaasortaasimavoq.

Politikkikkullu ukiorpassuarni suliaqarnini pissutigalugu Dronningip nersornaasiuttagaanik aamma Nersornaammi sølvimik kuultimillu nersornaaserneqarnikuuvoq.

Ukiut tallimat matuma siorna Otto Steenholdtip atuagaq 'Inuunera eqqartulaarlugu/Strejflys over mit liv' eqqaamasalersaarutini saqqummersippaa.

Atuaruk: Atuagaq nutaaq: Inuunera eqqartulaarlugu