peqquserluttoqarneranut suliaq
Otto Rosing: Inuunerput ingerlaqqissinnaanngorpoq
'Nuummioq'-mi ilitsersuisoq Otto Rosingip politiit Mikisoq H. Lyngemut suliartik unitsiinnarsimanerat nuannaarutigaa. Kisianni suliaq pillugu aamma pakatsissuteqarpoq
Politiit Mikisoq H. Lyngemut unnerluussinertik unitsiinnarsimallugu nalunaaruteqartoqarpoq, tamanna Sermitsiaq.AG-mit allaaserineqartareerpoq. Mikisoq H. Lyngep inatsisinik unioqqutitsisimasinnaaneranik politiit paasissutissanik amigaateqarnertik taamaasillugu suliaq unitsiinnarlugu.
Taamaasilluni suliffeqarfik million koruunip tungaanut akiligassaqarluni aamma sulisunut akissarsiassanik suli akiliutissaqarluni matuinnarpoq.
Misigissutsit assigiinngitsut
- Misigissutsikka assigiinngitsuusut oqaatigisariaqarpara. Taamatummi aalajangertoqarnerata pissutigisaanik inuunerput ingerlaqqissinnaalerpoq. Aappaatigulli nalunngilara (Mikisoq H. Lynge) assigiinngitsunik akiliuteqartarsimasoq suliffeqarfiup aningaasaataanik, Otto Rosing Sermitsiaq.AG-mut oqarpoq.
- Mikisup aningaasaqarneq paarinerlussimallugu nassueruteqartareerpoq. Politiit aalajangernerat tusaatissatut tiguara, aappaatigulli ugguaraara sooq politiit una suliamut atatillugu iliuuseqannginnerusimanersut, Otto Rosing oqarpoq. Mikisoq H. Lynge aamma Greenland Venture peqatigiillugitik '3900 Pictures ApS' piginikuuaat. '3900 Pictures ApS' filmi 'Nuummioq' suliaraa 2009-mi, suliffeqarfimmiliu Mikisoq H. Lynge pisortaalluni.
Otto Rosing nutaamik filmiliorluni aallartinnikuuvoq.