Oscarinik unnugu agguaasoqassaaq

Filminik nuannarisalinnut qilanaartuutissaq.

Filmimmi pitsaanerpaatut taaneqartut unnugu Oscarimik akissarsitinneqassapputl Akissarsititsineq soorunami Hollywoodimi, Los Angelesimi USA-mi ingerlanneqassaaq.

Ukiut 91-innaannik Oscarimik kuultiusumik agguaassisoqartussaavoq. Oscarinnallutik ajugaasussanik taasisartut, Oscar-akademiet, katillugit 7.902-nik ilaasortaqartoq, immikkoortuni assigiinngitsuni 24-ani ajugaasussatut innersuunneqarsimasuni taasereerput.

Danmark Oscarinnannissaminut neriuuteqalaarpoq. Qallunaaq filmiliaritilluni isiginnaartitsisartoq, Viggo Mortensen, filmimi ‘Green Book’-imi peqataanermini Oscarimut innersuunneqaqataavoq. Oscarimut pingajussaat innersuunneqarluni. Filmi ‘Green Book’ ‘Bedste Film’-itut (Isiginnaagassiatut pitsaanerpaatut, aaqq.) ajugaasussatut innersuunneqarpoq.

Taassuma saniatigut amerikamiu filmiliortilluni isiginnaartitsisartoq Glenn Close filmimi ‘The Wife’-imi inuttaanermini ‘Bedste mandlige og kvindelige hovedrolle’ (Filmimi inuttatut pitsaanerpaatut, aaqq.) innersuunneqarpoq. Filmip suliarineqarnerani qallunaat filmiliornermik suliaqartartuat ingerlatsivik Meta Film peqataasimavoq, filmiliortillunili isiginnaartitsisartoq ajugaassappat imaanngilaq filmiliornermik suliaqartut Oscarinnassasut.

Qallunaat filmiliaat marluk innersuunneqanngitsoortut

Qallunaat filmiliaat marluk Oscarimut innersuunneqarnissaminnut decembarimi 2018-imi tikkuarneqaraluarput.

Filmi ‘Den skyldige’ aamma Simon Lereng Wilmontsip piviusulersaarutaa ‘Olegs Krig’ innersuussassanngortinneqaraluarlutik. Filmilli taakku marluk Oscarimut innersuunneqanngitsoorput.

Oscarinik ajugaasunut agguaaneq unnugu kalaallit nalunaaqutaat malillugu 22:00 aallartissaaq, isiginnaartulli nalunaaqutaq 19:00 isiginnaalereersinnaapput, TV2-mmi filmiliornermik suliaqartut inersuarmut isaalerpata malinnaanerat kalaallit nalunaaqutaat malillugu 19:00 aallartissaaq.