Oscarinik agguaaneq: "Green Book" filmitsialattut toqqarneqarpoq

"Green Book" Viggo Mortensenimit pingaarnertut inuttaaffigineqartoq, ukioq manna Los Angelesimi Oscarinnatsitsinermi ataasinngornerup unnuaani filmitsialattut toqqarneqarpoq.

Filmi 1960-ikkunni USA-mi ammip qalipaataanik immikkoortitsinermut tunngasuuvoq, tassanilu angut taartumik ammilik pattattartoq Don Shirley tusarnaartitsiartoqattaarnermini Viggo Mortensenip inuttaanit ingiaqatigineqartumut tunngavoq.

Mahershala Ali angutini filmimi pingaannginnertut inuttaasut pitsaanersaattut nersornaaserneqarpoq. Viggo Mortensen angutini pingaarnertut inuttaasuni pitsaanertut nersornaaserneqarnissamut innersuunneqarpoq, kisiainni Rami Malek, Queenikkut erinarsortuata Freddie Mercurryp toqoreersup ilisaritinnera ajugaassutigaa.

"Green Book"-ip aamma manuskriptitsialattut toqqarneqarpoq.

Filmi akerleriiffiusinnaasumik isumaqarfigineqarpoq, USA-imilu ammip qalipaataanut tunngatillugu akerleriiffiusut ataasiinnarmik isiginiarneqarneranut takutitsisutut isornartorsiorneqarnikuuvoq.

Kisianni filmip ilitsersuisuata, Peter Farrellyp oqarnera naapertorlugu, “Green Book”-imi asanninneq pingaarneruvoq.

- Oqaluttuaq asanninnermut tunngavoq. Assigiinngikkaluarluta immitsinnut asanitsinnut aamma kikkuunitsinnik paasinninnermut, Peter Farrelly oqarpoq.