Ørsted nunatsinnut piareertoq
Danmarkimi nukissiuutinik ingerlatseqatigiiffik Ørsted Kalaallit Nunaanni ikummatissanik nukissiuutit mingutsitsinngitsut aqqutigalugit tunisassiulernissamut piareersimavoq.
Nunalerinermut, Imminut Pilersornermut, Nukissiuutinut Avatangiisinullu Nalaakkersuisoq Kalistat Lund suliffeqarfinnik aningaasaliisartunillu soqutiginnittunik, nunatsinni erngup nukinganik isumalluutit iluaqutigineqanngitsut ilaannik ikummatissamik mingutsitsisuunngitsumik brintimik tunngaveqartumik Power to X-imik taagorneqartumik pilersitsinissamut atuinissamik Kalaallit Nunaannik suleqatiginnikkusuttunik, sapaatip-akunnerani kingullermi ujartuivoq, aviisi Sermitsiaq allappoq.
Tamanna pineqartumi nunarsuarmi ataatsimeersuarnerit annersaanni, World Hydrogen Summitimi, Rotterdamimi marlunngornermi ullaakkut pivoq, tassani ilisimatuut, politikerit suliffeqarfinnillu aqutsisut 3.000-it ikummatissanik, nukimmik mingutsitsisuunngitsumik – pingaartumik ikummatissanut taarsiullugu motoorini toqqortarineqarsinnaasumik assartorneqarsinnaasumillu, pilersitsinissamut periarfissanik eqqartuipput.
Qulequttanik pilersitsisoq
- Ulloq taanna ulapaarfiuvoq, Kalistat Lund Sermitsiamut oqaluttuarpoq.
- Neqeroorut nunarsuaq tamakkerlugu suliamut tunngasuni tusagassiuuterpassuarni qulequttanik pilersitsivoq, taamaattumik ullup annersaa apeqqarissaarfigineqarnermut aamma suliffeqarfinnik aningaasaliisartunillu soqutiginnittunik ataatsimeeqateqarnermut atorpara.
Danmarkimi nukissiuuteqarnermi suliffeqarfissuaq, Ørsted, suliffeqarfiit suliniummik soqutiginnittut akornanniippoq.
- Suliniummut soqutiginnittorujussuuvugut peqataaffiginissaanullu piareersimalluta, Ørstedi Power to X-imut pisortaa, Anders Christian Nordstrøm, oqaluttuarpoq.
- Kalaallit Nunaat maanna sassartermat nunamilu erngup nukinganik periarfissanik nunarsuarmut tamarmut iluaqutaasussamik atorluaarusulermat isumaqarpugut tamanna pissanganartorujussuusoq. Kalaallit Nunaat mingutsitsinngitsumik nukissiuuteqarnermi angusaqartorujussooreersimavoq, illoqarfinni innaallagissamik atuinermut erngup nukinganik nunap siunniussaqarsimanera pissutigalugu. Kalaallit Nunaata imminut pilersornissani kisiat eqqarsaatiginagu aammali nunarsuup sinnerata ikiornissaanut piareerluni maanna nalunaarnera atugassarisanik misiginneqataanerujussuuvoq.
Allaaserineqartoq aviisimi Sermitsiami, sapaatip akunnerani matumani saqqummersumi, tamakkiisumik atuarneqarsinnaavoq. Aviisi uani pisiariuk: