Orpimmik ikitseriaraluarnerup kingorna sapaatip-akunnera qaangiuttoq: Maanna iluatsinneqassaaq, borgmesteri neriorsuivoq
Sisimiuni adventip sapaataani siullermi teknikkikkut ajutoortoqarnera pissutigalugu orpik ikinneqanngitsoorpoq. Maanna illoqarfimmi misileeqqittoqalerpoq - tamatumuuna akeqanngitsunik kakaoerlertoqarlunilu gløggillertoqassalluni.
Ileqquuvoq nunami illoqarfinni nunaqarfinnilu adventip sapaataani siullermi orpimmik ikitsisoqartarnera. Ukioq manna tamanna allaanerunngilaq. Sumiiffinnili tamani pilersaarutit malillugit ingerlasoqarsimanngilaq.
Sisimiuni meeqqat inersimasullu sila taarsimmat orpiup ikinneqarnissaannut asuli aggersimapput, orpimmi ikinneqanngitsoorpoq.
Ullormi pineqartumi juulimaaq oqarpoq, nissiaqqqat qinngasaarisuunngitsut: - Innaallagialerisunuku pisuusut, julemaaq taamanikkut Facebookikkut saqqummiussigami oqarpoq.
Pisuussut Sisimiuni Sarfalerisunit akisussaaffittut tiguneqarpoq. Inuttut kukkussuteqarsimaneq matumani pneqarpoq, Sarfalerisut ajuusaartut ilisimatitsipput.
Aappassaanik iluatsinneqassasoq
Adventip sapaataata aappaani illoqarfimmi orpik ikeqqeriarneqassaaq.
Borgmesterip Malik Berthelsenip Sermitsiaq.AG-mut oqaatigaa, juulimaap ullumikkut orpimmik nalunaaquttap 15.30-p missaani ikitsinissani iluatsissagaa.
Tamanna pissaaq borgmesteri innuttaasunut takkussimasunut oqaaseqareerpat, tamatuma saniatigut Sarfalerisut akeqanngitsumik kakaoillerlutillu gløggillissapput.