Annertuumik iliuuseqarneq
Orniguteqqaartoq: - Aatsaat taama annilaarnartigisumik takuvunga
Malik Niemann qulimiguulimmik timmisartortartutut Nuugaatsiami aseruinerujussuit innuttaasulli tupaqqaqisut siulliit ilaanniilluni takuvai
Malik Niemann qulimiguulinnik misilittagartuujuvoq, arlaleriarlunilu annaassiniarnerni timmisartortarsimalluni. Sorpassuarnillu takusaqarsimavoq. Taamaattoq Nuugaatsiami pisut sillimaffigisimanngilai.
- Aatsaat taama annilaarnartigisumik takuvunga. Uppernaaqaaq, aallaanngilaq filmi ernisinartuliaq, taanna Nuugaatsiamut tikilernernermini takusani pillugit taama oqarpoq.
I luften på få minutter
Malik Niemannip Uummannamiinnera nalaatsornerinnaavoq. Taanna suleqatiminik paarlaajartorsimavoq, tamannalu pissutigalu arfininngornermi unnukkut illoqarfimmi marlunnik Bell 212-nik qulimiguuleqarluni. Qujanartumilli taamaattoqarsimavoq.
Uummannami kalerrisaarut appinneqarmat, Malik Niemann innareersimavoq. Taanna ingalaakkut itsuarami illoqarfik aalassassimaaqisoq takuvaa.
Taassuma assit siulliit Facebookimi saqqummertitsilermata paasilerpaa Nuugaatsiaq malissuarmit eqqorneqarsimasoq.
Taanna suleqatiginilu Tonny Olsen piareersarput ornigussinnaanertillu nalunaarutigalugu.
Issittumi Sakkutooqarfiup nalunaaruteqarnerata kinguninngua qulimiguullik taakku marluk minutsit arlaqanngitsut ingerlanerini qangattarput. Niviarsiaq, indsatslederi, upalungaarsimanermik suliaqartut politiillu ilaasorineqarput.
Innuttaasut tupaqqasut
Naak assit Facebookimi Malik Niemannip takoreeraluarlugit, takusani assut annilaariummerpaa.
- Nuugaatsiaq nalunngikkaluaqaara, kisianni ilisarsaajunnaarsimavoq. Illut nunaqarfimmi nikititerneqarsimapput illulli tallimat arfineq marlulluunniit qaliai kisimik ersillutik imaaniilersimallutik, taanna oqaluttuarpoq.
Taakku qulimiguulik heliportimut mitsissinnaasimanngilaat, kisiannilu 200 300 missaani qutsitigisumi mittariaqarsimallutik.
- Qutsissorujussuarmi nunaqarfiup innuttaasuit takuagut, taanna oqaluttuarpoq.
Qissallutik, nilliallutik atisaqarpiaratillu taakku qulimiguulimmut arpassimapput.
- Pisinnaasarput tamaat tuppallersaaniarsarivugut, tupinnganngitsumilli assut tupaqqallutik.
- Ikiuiartorluta apuukkata eqitaarpaatigut noqillutali.
Qimarngussuineq
Aqqunarsimanerpaat marluk akiartaammiitillugit Malik Niemannip qulimiguulianut ikineqarput. Qulimiguulillit marluk Nuugaatsiap innuttaasuinit ulikkaarluni ilaasulersorneqarnerani, taakku marluk niviarsiamit nipaallisaatinik tunineqarput.
Aqqunartitserneqarsimanngitsut Uummannami niuneqarput.
- Illoqarfimmi malissaarsuaqarnissaanik aarlerisaarisoqarsimanera napparsimavimmiittulli qimarngussimaneqarnera pissutigalugu, narkorsat aqqunartitsersimasulli Qaarsuit mittarfiliaanneqarput, tassani utaqqiisaasumik napparsimmaveeqqamik pilersitsisoqarluni.
Tassanngaannik Nuugaatsiamut uterput, Malik Niemannilu inunnik nunaqarfimmit qimagussimasutut nalunaarutigineqarsimasunit ujaarinnilerluni.
Unnuk naallugu timmisaqattaartut
Nuugaatsiamilu innuttaasut tullii Uummannamut qimarngunneqarlutik.
Qulimiguullik taakku marluk pingajussaanik nunaqarfimmut uterneranni, Sikorsky-qulimguulik annaassiniarnermi atorneqartartoq aammalu qulimiguulik Lynx nunaqarfimmut ornigullutik apuutingajalersimapput.
- Uummannamut pingajussaanik apuukkatta unnukkut naallugu timmisaqattaarsimavugut. Assut anniaqaagut, Malik Niemann oqarpoq.
Piffissami tassani kalerrisaarutip appinneranit nalunaaquttap akunneri qulit qaangiussimapput.