Aningaasanut inatsit

Oqimaaqatigiisitsineq 145 millioninik amigartoorummik taarserneqartoq

Ukioq ataaseq sinneqartoorsinnarluni ukiuni pingasuni amigartoornissaq aningaasanut inatsimmik isumaqatigiissuteqarnerup kingunerissavaa

Naalakkersuisut aningaasnut inatsisissamik siunnersuuteqarlutik aggustimi saqqummiussipput, taanna ukiut sisamat ingerlanerini oqimaaqatigiittussatut inissinneqarpoq. 2017-imi aamma 2019-imi sinneqartooruteqarnissaq siunniunneqarpoq, 2018-imi 2020-milu amigartoortoqartussaalluni.

Atuaruk: Aningaasanut inatsit piareerpoq

Aalisakkat Pituffillu saniatigut aningaasannassutaapput
Novembarip 15-anni aappassaaneerneqarnerani katinnera 0-iusoq 1 millioninik amigartooruteqalerpoq. Tassa 2017-imi sinneqartoorutissatut naatsorsuutigineqartut 33 millionit koruuninit 58 millionit koruuninut amerleriarput, kisianni tamatuma peqatigisaanik aningaasartuutit amerleriarput, taamaalilluni ukiuni tulliuttuni oqimaaqatigiissaarneq ajorseriartippaa.

Tassani kiffartuussinermut isumaqatigiissutinut saniatigut pitsanngorsaalluni aningaasaliissutit ingammik malunnaataapput. 2017-imi angusat pitsaanerunissaanik isikkoqarneri, aalisarnermit isertitat ilimagisamit amerlanerunerannik aamma Pituffimmi kiffartuussinermut isumaqatigiissutip sivitsorneqarneranik pissuteqarput.

Atuaruk: Demokraatit amigartoorneq quarsaarutigaat

Isumaginninnermi suliniutinut aningaasat
Kisianni naalakkersuisoqatigiit nutaat pilersinneqarput, taakkulu isumaginninnermut tunngasuni suliniuteqarnerup nukittorsarneqarnissaa annertuumik kissaatigaat. Aallaqqaammut aggustimi siunnersuutaasumut sanilliullugu 2017-imi katillugu 60 millionit koruunininik amerlanerusunik aningaasaliissuteqartoqarpoq.

Taakku aningaasat pingajoraarterutaat kiffartuussinermut isumaqatigiissutit pitsanngorsarneqarnerinut atorneqassapput.

Atuaruk: Kiffartuussinermut isumaqatigiissummut 22 millionit saniatigut aningaasaliissutaasut

Ukiuni pingasuni amigartoorneq
Taamaakkaluartoq 2017-imi saniatigut isertitat taakkartorneqartut pissutigalugit 22 millionit koruuninik sinneqartoortoqassaaq. 2018-imili 55 millionit koruuninik amigartoortoqassaaaq, 2019-imilu 14 millionit koruuninik amigartoortoqassalluni. 2020-mi amigartoorutaasussaq 98 millionit koruuninut amerleriassaaq.

Katinnerani 145 millionit koruuninik amigartooruteqartoqassaaq.

Powered by Labrador CMS