Oqartussat: Qimmit qimuttut kisimik qimuttoqarfinniissinnaapput
Qimminik qimuttoqarfiusunut qimmit qimuttuunngitsut eqqunneqarnissaat inerteqqutaasoq, Kalaallit Nunaanni Uumasut Nakorsaqarfik Inuussutissalerinermullu Oqartussaaffimmit (UNIO) eqqaasitsissuteqarpoq.
Kalaallit qimmii qimuttut illersorniarlugit qitsunnillu nunatsinnut eqqussisarneq taakkulu Kalaallit Nunaanni namminermi angallanneqartarnerinut maleruagassat matumuuna Kalaallit Nunaanni Uumasut Nakorsaqarfik Inuussutissalerinermullu Oqartussaaffimmit (UNIO) eqqaasitsissutigineqarput.
Tassami qimminik qimuttuunngitsunik qimminik qimuttoqarfinnut nassataqarneq inerteqqutaalluinnarpoq.
- Tassani pineqarput qimmit takornarianit soorlu umiarsuit takornariartaatsit atorlugit nassarneqartartut kiisalu najukkani ataasiakkaani qimmiutigisat nunatsinni namminermi angalanermi nassarneqartartut, Kalaallit Nunaanni Uumasut Nakorsaqarfik Inuussutissalerinermullu Oqartussaaffimmit ilisimatitsissutigineqarpoq.
Taamaattorli Kalaallit Nunaanni Uumasut Nakorsaqarfik Inuussutissalerinermullu Oqartussaaffiup maluginiaqquaa, qimmit sulinermi kiisalu innarluutilinnit ikiortitut atorneqartartut qimmeqarfinnut eqqunneqarsinnaapput, tamannali aatsaat pisinnaalluni Namminersorlutik Oqartussat immikkut akuersissuteqarneratigut.
Qimmit qimuttut Kalaallit Nunaanniit annissat qimminik qimuttoqarfiusut iluinut avataannulluunniit aamma eqquteqqeqqusaanngillat.
Kalaallit Nunaata Avannaa Kitaalu allorniusat sanimukartut 66°-imit (qaasuitsup killeqarfia) avannamut, kiisalu Kalaallit Nunaata Kangia tamarmi kujammut Nunap Isua tikillugu, allorniusat tukimukartut 44° kangia.