Oqartussat: Nalunarpoq qaqugu innaallagiqartoqaleqqissanersoq

Obs.: Innuttaasut innaallagiamik, kiassarnermik imermillu amigaateqartut pinartoqartillugu Kommuneqarfik Sermersuumut saaffiginnissinnaanerat pillugu ilanngussisoqarpoq.

Nuummi innaallagiaaruttoorneq qanoq sivisutigiumaarnissaa suli ilisimaneqanngilaq.

Politiit nal. 14.30 naatsumik taama nalunaaruteqarput:

- Kalaallit Nunaata Politiivi, Nukissiorfiit, Tusass, Kommuneqarfik Sermersooq, qatserisartut Arktisk Kommandolu suleqatigalugit Nuup innaallagiaqalernissaa sulissutigaat.

- Qaqugorpiaq illoqarfik innaallagiaqalerumaarnersoq suli oqaatigineqarsinnaanngilaq, politiit ilisimatitsipput.

Politiit Facebookiminni allapput Nuup ilaani innaallagiamik pilersuineq iluatsinneqarsinnaasimasoq:

- Nuummi innaallagiamik pilersuinerup ingerlateqqilernissaa sulissutigineqarpoq. Inuiaqatigiinnili pisariaqarnerpaat, soorlu napparsimmavimmut, utoqqaat illuinut, nerisassanik nioqquteqartunut, politiinut, qatserisartunullu innaallagiaqalersitsinissaq siullertut sulissutigineqarput.

- Nuummi Nuussuarmi Qinngorpumilu innaallagiamik pilersuinissamik tamakkiisumik aaqqiissoqarnissaa qulakkeerneqarsinnaanngilaq. Illoqarfiup immikkoortui tamarmik qaqugu innaallagiaqalerumaarnersut maanna oqaatigisinnaanngilarput.

Politiit allapput upalungaarsimanermut nalunaarutit tusagassiorfinnut Facebookikkullu nalunaarutigisaqattaassallugit.

Nuuk ataasinngornermi unnukkut nal. 23.00 innaallagiaaruppoq. Utoqqarmiut Kangerluarsunnguani erngup nukiganik pilersuiffimmit innaallagiamut attaviit anorersuarujussuarneranit ajoquserneqarsimapput. Illoqarfiup innaallagiaqaleqqinnissaa oqartussat ulloq naallugu sulissutigaat.

Innaallagiaarunnermi illoqarfimmi pinasuartumik suliallit arlallit eqqorneqarput, nunalu tamakkerlugu attaveqaatit aamma eqqorneqarlutik.

Tusass ilisimatitsivoq, qaammataasatigut attaviit radiotigullu attaviit suli ajunngitsut.

Politiit ilisimatitsipput innuttaasut innaallagiamik, kiassarnermik imermillu amigaateqartut pinartoqartillugu Kommuneqarfik Sermersuumut saaffiginnissinnaasut.

- Taamaasiorsinnaapput kommunip allaffianut namminneerlutik aggerlutik, imaluunniit kommunimut oqarasuaat +299 367281 sianerlutik. Oqarasuaatitigut attaviit suli kipisaqattaarsinnaanerat eqqumaffigeqquneqarpoq, politiit allapput.