Oqartussat erseqqissaapput: Timmisartup isumannaallisaalluni milernerani kalerrisaarineq kukkuneruvoq
Timmisartoq Nuummi sapaatikkut ullaakkut isumannaallisaarluni minnialermat Nuummiut tamakkerlugit kalerrisaarneqarnerat inissaminiinngilaq. Kukkussutigineqartoq aaqqinneqareerpoq, upalungaarsimasut ilisimatitsipput.
Nuummi innuttaasut arlallit ajunaarnersuaqalernermi kalerrisaarut sapaatimmi ullaakkut aallartinneqartoq tusaasimassavaat. Timmisartormi isumannaallisaalluni minnialermat mittarfeqarfimmi nakkutilliisut kalerrisaarut aallartippaa, upalungaarsimasut pilertortumik aggernissaat siunertaralugu. Innuttaasulli tamarmik tusaasinnaasaannik kalerrisaarisoqartussaasimanngikkaluartoq, Kommuneqarfik Sermersuumi upalungaarsimasut maanna ilisimatitsipput.
- Qatserisartoqarfimmut nutaamut pinitsinni pigaartut nakkutilliisoqarfiat nutartersimavoq. Upalungaarsimasullu kalerrinneqassatillugit toortaat toorneqarmat, ajunaarnersuaqalernerani kalerrisaarut aamma aallartippoq. Maanna paasivarput upalungaarsimasunut kalerrisaarut ajunaarnersuaqalerneranut kalerrisaarummut attavilerneqartoorsimasoq. Kukkuneq tamanna akisussaaffigaarput, upalungaarsimasut pisortaata tullia Jens Mikkelsen, pisimasoq pillugu tusagassiortunut ataasinngornermi ualikkut nassuiaateqarnerminni ilisimatitsivoq.
Kommuneqarfik Sermersuumi upalungaarsimasut ilisimatitsipput kukkuneq maanna aaqqinneqareersimasoq.
Upalungaarsimasut kisimik kalerrinneqassapput
Timmisartoq isumannaallisaarluni minniartussanngoraangat upalungaarsimasut kalerrinneqartussaapput. Mittarfeqarfiit sapaammi tusagassiorfinnut nalunaaruteqarlutik ilisimatitsipput periusaareertoq "silaannakkut kalerrisaarinerup aallartinneqartarnera, pisumi suleqatigisat oqartussallu piaarnerpaamnik iliuuseqarnissaat siunertaralugu”. Taamalli periuseqartoqarnera upalungaarsimasut pisortaata Knud Petersenip ilisarisinnaannginnerarpaa.
Tusagassiortunik katersortitsinermi politiinit peqataatinneqartoq, politikommissær Malik Olesen ilisimatitsivoq ajunaarnersuaqalernerani kalerrisaarut politiit kisimik aallartissinnaagaat. Pisoq annertuumik ulorianaateqarsinnaappat navialisitsisinnaallunilu, kalerrisaarut aallartinneqarsinnaavoq. Soorlu toqunartumik siammaasoortoqarneratigut.
- Pisut assigiinngitsorpassuit pillugit politiit nalunaarfigineqartarput. Nalunaarutillu tamaasa ataasiakkaarlugit nalilersorneqartarput. Politiit naliliinerat aallaavigalugu ajunaarnersuaqalerneranut kalerrisaarut aatsaat aallartinneqarsinnaavoq, Malik Olesen oqarpoq.
Kalerrisaarutit nalilersorneqassapput
Nuummi ajunaarnersuaqalerneranut kalerrisaarut aatsaat aallartinneqalinngilaq. Ilaatigulli kukkuneq tunngavigalugu aallartinneqartoorsinnaasarluni.
Kalerrisaarineq kukkunerluunniit apeqqutaatinnagu, innuttaasut nittartakkani attaveqatigiittarfiusuni oqallisigaat Nuummi sumiiffiit ilaanni kalerrisaarisoqarneranik tusaasaqarsimannginnerarlutik.
- Oqartussat suleqatigisartakkagut peqatigalugit tamanna aamma nalilersussavarput. Nalilersorneqassaaq kalerrisaarut ataasiinnaq illoqarfimmut suli naammannersoq, allatigulluunniit iliortoqassanersoq, politikommissær Malik Olesen oqarpoq.
Kalaallit Nunaata Politiivinit Malik Olesenip politiit innuttaasunut piaarnerusumik pitsaanerusumillu saqqummiussisimasinnaanerat aamma oqaatigaa.