Skip to main content

Oqartussaaqataanikkut inatsisitigullu ajornartorsiut

Qinersisartunit politikerinillu tatineqaleraluttuinnartoq politikerinit landskarsip aningaasaataanik atornerluisoqarsimaneranik misissuinerup tamanut saqqummiunneqarnissaa, Inatsisartut siulittaasorigallagaata Lars-Emil Johansenip aalajangiusimavaa misissuineq Kukkunersiuinermut Ataatsimiititaliap inniminnersimasaa Kukkunersiuinemut Ataatsimiititaliap kisimi atuarsinnaagaa

Oqartussaaqataanikkut ajornartorsiuteqartorujussuanngorsimavoq. Illua'tungaatigut qinersisartut politikerillu piumasaraat politikerit pisortat aningaasaataannik atornerluisimanerannik Deloitte-p misissuinera qinersineq sioqqullugu tamanut saqqummiunneqassasoq, taamaasilluni qinersisartut namminneq aalajangersinnaallugu atornerluisoqarsimappat tamakkua taarusunnerlugit. Aappaatigut Lars-Emil Johansen oqarpoq misissuineq tamanna tamanut saqqummiussinnaanagu. Kukkunersiuinermut Ataatsimiititaliaq nutaaq kisimi taamaasiorsinnaavoq.

Qanorli pisoqassava paasinarsippat politikerit qinigaarlaat ilaat unioqqutitsillutik landskarsip aningaasaataanik atornerluisimasut. Qinigaasinnaanermut Ataatsimiititaliaq politikerinut tamakkununnga qanoq oqassava? - Tamanna ajornartorsiutaasorujussuussaaq, Inatsisartunullu nutaanut nuannernavianngilaq ajornartorsiummut tamatumunnga isummissalluni.

Piffissami matumani Revisionsselskabet Deloitte-mi piginneqataasoq politikerinut sianeqattaarpoq oqaluttuullugit misissuinikkut paasineqarsimanersoq landskarsimit atornerluisimanersut atornerluisimannginnersulluunniit. Politikerit ajornartorsiuteqatanik nalunaarfigineqartut Facebookikkut atertik taallugu saqqummertarput. Unnerluunneqarsimasumilli, imaluunniit unnerluunneqartussamik, suli sassartoqanngilaq.

Misissuinerup tamanut saqqummiunneqarnissaanik tatisinerup annertusigaluttuinnarnera tunuliaqutaralugu Lars-Emil Johansen apereqqipparput, taannalu tallimanngormat kingusissukkut Sermitsiaq.AG-mut ima akivoq:

– Ulluni kingullerni tusagassiorfinnut arlalinnut oqartarsimanittut inatsisitigut tunngavissaqanngilanga Inatsisartuni atorunnaarsinneqarsimasuni angerlartinneqarsimasunilu siulittaasuugallartutut misissuineq, kukkunersiuinermut ataatsimiititaliamit atorunnarsimasumit inniminnerneqarsimasoq, tamanut saqqummiutissallugu.

Lars-Emil Johansen nangippoq:

– Nalunaarusiamik soqutiginninneq paasinarpoq, misissuinerli Kukkunersiuinermut Ataatsimiititaliamit inniminnerneqarsimammat kukkunersiuinermut ataatsimiititaliamit kisimi tamanut saqqummiunneqarsinnaavoq, aatsaallu Kukkunersiuinermut Ataatsimiititaliap misissuinermut Naalakkersuisut oqaaseqaatai tigoreerpagit, ataatsikkut saqqummiunneqarnissaat siunertaralugu. Tamakkua tamarmik aatsaat pisinnaapput qinersinerup kingorna Inatsisartullu nutaat ataatsimiilereerpata.

– Nalinginnaanerusumik imaattarpoq qinersinissaq suaarutigineqaraanga Inatsisartut atorunnaartarlutik. Tassa imaappoq, Inatsisartuni Inatsiartullu ataatsimiititaliaanni sulineq unitsinneqartarpoq. Taamaallaat Aningaasanut Ataatsimiititaliaq, inatsisitigut immikkut inissisimasoq, qinersinissamik nalunaarutiginninnerup kingorna pissutsit immikkut itsillugit kinguartinneqarsinnaanngitsumik ilassutitut aningaasaliissutissanut qinnuteqaatinut isummersinnaavoq. Ataatsimiititaliat allat atorunnaarsinneqartarput aalajangiisinnaanatillu, Lars-Emil Johansen Sermitsiaq.AG-mut nassuiaavoq.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER