Oqartussaaffimmik angerlaassinissaq pillugu suliassaq akerleriissutaasoq kinguartinneqartoq

Aalajangiiffigisassatut siunnersuutip uumasunut nakorsaqarnermut inuussutissalerinermullu tunngassuteqartup aappassaanik suliarineqarnissaata kinguartinneqarnissaanut Naalakkersuisut marlunngormat akuerineqarput.

Inatsisartut uumasunut nakorsaqarnermut inuussutissalerinermullu oqartussaaffimmik angerlaassinissaq pillugu aalajangiiffigisassatut siunnersuut marlunngormat aappassaaneerlugu suliarisussaagaluarpaat. Naalakkersuisulli qinnuteqarnerisigut sammisassaq ullormut oqaluuserisassanit peerneqarpoq.

Aalisarnermut, Piniarnermut Nunalerinermullu Ataatsimiititaliaq isumaqatigiittoq Naalakkersuisunik uivertitsileraluarpoq. Ataatsimiititaliammi isumaqatigiittup uumasunut nakorsaqarnermut inuussutissalerinermullu oqartussaaffiup 2020-mi ukiakkut katersuunnermi angerlaanneqarnissaa isumaqatigiissutigaa.

Taamatut nalunaaruteqarneq Naalakkersuisunit akuersaarneqanngilaq, taakkumi isumaqarput ataatsimiititaliap aalajangernera – Inatsisartuni amerlanerussuteqartut akuersaassappassuk – Kalaallit Nunaata avammut tunisaqartarnera aningaasaqarneralu ajoqusissagai.

Powered by Labrador CMS