Oqariartuut: Silarput suli paarilluartigu

Silap pissusia allanngoriartorpoq, meeqqat inuusuttullu tamanna ernumanartoqartippaat, Nakuusami meeqqat isummersorfiineersut politikerinut sapaatip akunnerani matumani taama oqaluttuarput.

Meeqqat Nakuusami meeqqat isummersorfiineersut ukiaq ataatsimeersuarnerminnit politikerinut arlalinnut sapaatip akunnerani matumani oqariartuutiminnik apuussaqarput – aamma naalakkersuisumut Peter P. Olsenimut (IA).

Oqalugiaammi meeqqat silap pissusiata allanngoriartornera pillugu ernumassuteqarnertik oqariartuutigaat, silap pissusialu pillugu inuusuttut suliniutillit ulluinnarni ajornartorsiutit qanoq aaqqiivigineqarsinnaanerinut siunnersuuteqarput, Unicef Naalakkersuisut peqatigalugit Nakuusamik ingerlatsisoq taama oqaluttuarpoq.

- Unikkallalaaritsi, oqariartuutigullu tusarnaarlugit. NAKUUSAp 2022-mi Meeqqat Ataatsimeersuarneranni Kalaallit Nunaat tamakkerlugu meeqqat 43-t Meeqqat Isummersorfiineersut katersorpaat. Tassani, nunatta siunissaasugut, Kalaallit Nunaanni silap pissusiata allanngoriartornera eqqartorparput.

- Pissuserisartakkat allanngortinnissat, uagut meeqqattalu inuuffissaqarnissaat, inuit tamarmik akisussaaffigaat, meeqqat politikerinut ilaatigut taama oqariartuuteqarput.

- Ernumatippaatigut

Meeqqat aamma Kommuneqarfik Sermersuumi kommunalbestyrelsimut Nuummilu Ataatsimiititaliamut oqariartuuteqarput.

- Apisarnera kinguaraluttuinnarpoq, sermersuaq aakkiartorpoq, Tunumi piteraq sakkortusigaluttuinnarpoq tamakkulu ilaatigut nerisareeqatigiinnut, uumasunut pinngortitatsinnullu kusanaqisumut kingunerluuteqarput… Silap allanngorujussuarsimanera uatsinnut annilaangalersitsivoq ernumatitsillunilu, oqalugiaammi taama oqariartuuteqarput.

Borgmesteri Avaaraq Olsen (IA) pikkuginnippoq:

- Aalajangiisartut saallugit qanoq pitsaanerusumik iliorsinnaanersugut pillugu saqqummernersi torrak. Siunnersuutitsialappassuupput aamma ilumoortortaqarput. Nuna tamakkerlugu meeqqat assigiimmik ernumassuteqarnerat aaqqiivigerusullugulu oqariartuutigineqartoq maluginiagassaalluarpoq, borgmesteri oqarpoq.

Uani videomi meeqqat oqariartuutaat tusarnaarsinnaavatit:

Powered by Labrador CMS