Oqarasuaatikkut siunnersuisarfik februaarimi aatsaat ammassaaq

Tusaannga nalunaarutigineqareeraluartoq, januaarip aallaqqaataanni ammassanngilaq.

Peqqissutsimut Isumaginninnermullu Naalakkersuisoq sapaatip akunnerata siuliani tusagassiortunik katersortitsinermini nalunaarutigaa tamanut oqarasuaatikkut siunnersuisarfissaq, Tusaannga, januaarip aallaqqaataani ammassasoq.

Taamalli sukkatigisumik ammarnavianngilaq, Tusaannga februaarip aallaqqaataani aatsaat ammassaaq. Naalakkersuisoqarfik tusagassiortunut taama nalunaaruteqarpoq.

Oqarasuaatikkut siunnersuisarfik nutaaq inunnit imminut toqunneq pillugu, kinguaassiutitigut kannguttaatsuliorfigineqarsimaneq pillugu, nakuuserneq assigisaannilluunniit ajornartorsiuteqaraanni saaffigineqarsinnaavoq. Maannamut siunnersuisarfiit arlallit, piffissami killeqarnerusumi ammasartut, atorneqarput. Tusaannga ullut tamaasa ualikkut sisamaniit unnukkut qulit tungaannut ammatinneqartassaaq.

Siunnersuisarfimmut sianerfissaq unaalissaaq: 801180.

Powered by Labrador CMS