Oqaluttuatoqqat frimærkini nutaani
Te-Postip frimærkit nutaat kalaallit filmiliaannut kalaallillu anersaalersaarutaannut tunngassuteqartut saqqummiuppai.
Kalaallit Nunaanni filmiliat ukiuni qulikkaani amerlasuuni, nunarsuarmi tamani isiginnaartunit nuannarineqarluarsimapput. Taamaattumik TELE-POST aalajangerpoq frimærket tulleriiaat nutaat filmilianut tunngasuussasut.
- Filmilianut aalajangersimasunut marlunnut plakatit ilaarlugit frimærkeliorsimavugut, Tele-Post nittartakkamini allappoq.
Siulleq tassaavoq ’Paalup Nuliarsarnera’, 1934-mi Friedrich Dalsheim ilitsersuisoralugu filmiliarineqarsimasoq sikuiuitsumullu ilisimasassarsiortartumit ilisimaneqarluartumit Knud Rasmussenimit manuskriptiliarineqarsimasoq. Aappaa tassaavoq ’Qivittoq’ 1956-mi sqqqummertoq, Erik Ballingimit ilitsersorneqarsimasoq Leck Fischerimillu allanneqarsimasoq.
Filmiliat frimærkeliarineqarnerisa saniatigut, Kalaallit Nunaanni anersaalersaarutinut tunngasut pillugit frimærkit nutaat Tele-Postip saqqummiuppai.
Ulloq manna tikillugu Kalaallit Nunaanni kristumiuussuseq anersaanillu upperisaqarneq sanileriillutik piusimapput. Tamanna piorsarsimassutsimut pingaaruteqarpoq Inuillu upperisatoqaanniit aallaaveqarluni. Ilaatigut oqaluttuatoqqani amerlasuuni tamanna takuneqarsinnaavoq. 1950-kunnilli aamma tamanna frimærkini malunnartinneqareersimavoq, Tele-Post frimærkit nutaat pillugit allappoq.
- Maannakkut nutaaliorluta ’Kalaallit Nunaanni anersaat pillugit oqaluttuat’ isiginiassavagut. Frimærkit marluk kusanarluinnartut, Maria Bach Kreutzmannimit Christian Fleischer Reximillu titartarneqarsimasut aallartissutigissavagut.