Oqaluttuarisaanermik ilisimasaqannginneq nuannareqqusaarnermik pilersitsisartoq
Fagi oqaluttuarisaaneq Atuarfitsialammi tulleriiaarinermi tunullinngortinneqarpoq
Nunatta Katersugaasiviata Allagaateqarfiatalu saqqummersitsivii igalaamernit toqqorsiviilu Nunatta oqaluttuarisaaneranik ulikkaavipput, inuiaqatigiinnili oqaluttuarisaanermik ilisimasaqannginneq siaruaappoq, minnerunngitsumik sapaatip akunnerini makkunani qineqqusaarnerni tamanna saqqummersarluni, oqallisigineqartorpassuarni qineqqusaarutinilu siornatigut qinersinerni saqqummiunneqartareersut atoqqinneqartarlutik.
Tamannalu ulorianartuuvoq.
– Oqaluttuarisaanermik ilisimasaqannginneq inuiaqatigiinni ajornanngippallaamik nuannareqqusaarnermik kinguneqartarpoq, pisortaq Daniel Thorleifsen mianersoqqusivoq.
Politikerit qineqqusaarutigisartakkatik assigiit ukiut sisamakkaarlugit saqqummiuttarmatigik tamanna ajornannginaarineruallaarpa, innuttaasut ataatsimoorussaminnik eqqaamasaat eqqaamaneqanngippallaarmata?
– Aap, taama isumaqarpunga. Oqaluuserisat nuannarineqartut nuannareqqusaarnerillu oqallisigineqaqqilersarput, taamaattorli politikerit qinersisartunut ukiut sisamat, arfineq-pingasut imaluunniit aqqaneq-marluk matuma siornagut qinersisartunut neriorsuutiminnik suli piviusunngortinneqanngitsunik uteqqiisaqattaaleraangata akisussaatinneqarneq ajorput, Daniel Thorleifsen Sermitsiamut oqarpoq.
Fagi oqaluttuarisaaneq atuartitsissutaanngitsoq
Sooruna pissutsit uteqattaaginnarneqartartut?
– Tamatumunnga patsisaavoq, oqaluttuarisaaneq inuiaqatigiinni ajornartorsiutinut aaqqiinissamut atorneq ajoratsigu, Daniel Thorleifsen oqarpoq, inuiaqatigiilli pitsaanerusut kissaatigigutsigik, oqaluttuarisaanermit ilinniartuarnissarput pisariaqarpoq.
Daniel Thorleifsenip oqaatigaa, oqaluttuarisaanermik paasisimasaqannginnermut pingaarutilittut patsisaasoq oqaluttuarisaaneq atuarfimmi fagitut peerneqarsimammat.
– Tamatuma peqatigisaanik ilinniartitsisunngorniartarnermi meeqqat atuarfianni tiimit ingerlanneqartartut naleqqussarfigineqarput. Taamaalilluni ilinniartitsisunngortartut Nunatta oqaluttuarisaaneranik pisariaqartumik paasisimasaqalernissaminnut taamalu fagimi sukumiisumik ilinniartitsinissaminnut ilinniartitsisinnaanngimmata, oqaluttuarisaanermik paasisimasaqannginneq immami minittornertut siaruariartuaartarpoq, Daniel Thorleifsen oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: