Oqaluttuarisaanermik ilisimasalik: Eqqaassutissap akerlerineqarnera paasinarpoq
Hans Egedep eqqaassutissaa naleqqunnerusumut inissinneqanngikkuni serlersaarfigineqartuassaaq, oqaluttuarisaanermik ilisimasalik isumaqarpoq
Hans Egedep eqqaassutissaa Nuummiittoq sapaatip ullaassaani qalipaammik aappaluttumik seqqartarneqarsimavoq, eqqaassutissamullu ”decolonization” allanneqarsimalluni.
Nunatta Katersugaasiviani Allagaateqarfianilu oqaluttuarisaanermik ilisimasallip pisortallu Daniel Thorleifsenip paasisinnaanerarpaa, eqqaassutissap nunasiaataasimanermut attuumatinneqarnera:
- Nunasiaataasimaneq erseqqissumik akerlerineqarpat, Hans Egedep eqqaassutissaata kamaatigineqarnera paasinarpoq, Daniel Thorleifsen Sermitsiaq.AH-mut allakkatigut akissuteqarluni allappoq.
Erseqqissupilussuarmik inissisimaffeqartoq
Oqaluttuarisaanermik ilisimasalik isumaqarpoq, eqqaassutissap inissinneqarfigisimasaa pingaartumik akerlerineqartoq:
- Hans Egedep eqqaassutissaa erseqqissupilussuanngorlugu qaqqap qaavanut inissinneqarsimavoq, Nuummullu tikikkaanni takunngitsoorneqarsinnaanani. Ajoqersuiartorsimasup nunasiaatillit sinniisaattut isigineqartup illoqarfimmi takunngitsoorneqarsinnaanngitsumik inissinneqarsimanera, inuppassuarnut kamassaataasinnaavoq, taanna allappoq.
Eqqaassutissaq nuunneqarli
Nunarsuarmi sumiiffinni arlalinni eqqaassutissat nunasiaataasimanermut takussutissaasut piiarneqarput. Ilaatigut USA-mi Christoffer Columbusip eqqaassutissai piiarneqarlutik.
Daniel Thorleifsen naapertorlugu, eqqaassutissap allamut nuunneqarnera aaqqiissutaasinnaavoq:
- Immaaqa akuersaarneqarnerusinnaassagaluarpoq, eqqaassutissaq naleqqunnerusumut, soorlu Hans Egede Illuata imalunniit Hans Egedep oqaluffiata eqqaanut nuunneqartuuppat, Daniel Thorleifsen naliliivoq.