Oqaluttuarisaaneq pikataanikkut tammartinneqarpoq
Nunat Tamalaat Katersugaasivinnut Ulluat, Nuup Katersugaasivianit Nunattalu Katersugaasivianit Allagaateqarfianillu aaqqissuunneqartumik, Nuutoqqami pisuttuarnermik nalliussineqarpoq. Tassani paasinarsivoq illutoqqat, ilaatigut Hans Egedep Illuata 1721-imeersup, attatiinnarnissaat qanoq ajornakusoortigisoq.
Nuup Katersugaasiviata, Nunatta Katersugaasiviata Allagaateqarfialu suleqatigalugu, sapaatip-akunnerani kingullermi marlunngormat Nunat Tamalaat Katersugaasivinnut Ulluat malunnartimmassuk inuit 20-t missaanniittut peqataapput.
Aviisi AG taama allappoq.
Katersugaasiviit Nuup illoqarfiata ilaani Nuutoqqami pisuttuartitsipput, nunattalu katersugaasiviani illunut eqqissisimatitanut inspektørip Inge Bisgaardip illutoqqat oqaluttuarai. Nuutoqaq 1700-kkunni, Hans Egedep tikinnerani, ineriartortinneqalerpoq.
Pisuttuarnerup kingorna ersarissivoq illutoqqat attatiinnarnissaannut ajornartorsiutaanerpaasoq suliarinnittartut assigiinngitsut illutoqqanik ilisimasaqannginnerat. Siullermik Naalakkersuisut siulittaasuata ilaqutaasalu illuat oqaluttuaraa.
- 2011-imi illu iluarsaanneqarpoq asserluinnaatut ilillugu, tamannalu uggornaqaaq, tassami illu ajunngivissuugaluarmat sananeqaataalu ajoquteqarani. Sannarlunneq pissutigalugu oqoqalaarsimavoq, tamannali iluarsineqarsimasinnaagaluarpoq, Inge Bisgaard oqaluttuarpoq.
Hans Egedep Illuata silataa ukiut pingasut missaasa matuma siornatigut nutarterneqarpoq, maannali ilaa nakkaakkiartulereersimavoq.
- Tamatumunnga suliaq aallartinneqarmat illu masassimammat, maanilu illulioriaasitoqaq ilisimasaqarffigineqarpianngimmat, iluarsaassinerpassuit ingerlanneqartarsimapput. Tassani kukkussutaagajuttarpoq iluarsaassinerni tarngutip ataqatigiissitsisussapp manngerpallaartup atorneqartarnera, taanna oqaluttuarpoq.
Aviisimi AG-mi atuarnerusinnaavutit. Aviisi uani pissarsiariuk: