Oqaluffiit matupput: Innuttaasut oqaluffinni pisussanik namminneerlutik kinguartitsipput
Nuummi oqaluffiit marluk, Annaassisitta Oqaluffia aamma Hans Egedep Oqaluffia, sapaatit akunnerni pingasuni tulliuttuni matoqqasussanngorput. Oqaluffinni pisussat pilersaarutaareersut pillugit innuttaasut namminneerlutik kinguartitsiumallutik sianertartut, palasi ilisimatitsivoq.
Allaffiit suliffeqarfiillu allarpassuit assigalugit, Nuummi oqaluffiit ullumimiit matoqqapput. Palasit sulisullu allat biskoppimit angerlartinneqarsimapput.
Palasi, Aviaja Rohmann Sermitsiaq.AG-mut ilisimatitsivoq inuit namminneerlutik sianertartut, kuisitsinissat katinnissallu kinguartikkumallugit.
- Pisut pillugit inuit paasinnilluarput, piffissamillu kinguartitsiumallutik sianertarlutik, Aviaja Rohmann oqaluttuarpoq.
- Pisussat ingerlatiinnarneqarnissaat suli periarfissaagaluarpoq, pisussanili peqataasut amerlanerunissaat kissaatigineqartarpoq, palasi oqarpoq.
Ilisinerit
Ippassaq ualineranit inuit qulit sinnerlugit ataatsimoornerit inerteqqutaalerput, coronavirusimik tunillatsittoqarnissaa aarleqqutigineqarmat. Ullut marluk ingerlaneranni inuit marluk covid-19-imik tunillatsillutik napparsimalersimasut Nuummi paasineqarput, tunillatsissimasup aappaa nunani allani Nuummiluunniit tunillatsissimanersoq nalileruminaatsinneqarpoq.
Taamaammat ilisaasusap qanigisaata namminneerlutik aalajangersinnaavaat ilisineq, inunnit qulinit peqataaffigineqarsinnaasoq ingerlatiinnassanerlugu, imaluunniit pisussaq kinguartinneqarallassanersoq.
- Ilaqutaasut ilisinissaq pillugu sianerpata, pisoq pillugu oqaloqatigisussaavagut. Sapinngisamik qanigisaasut ataaseq marluinnaalluunniit oqaloqatigisariaqassavagut, nassuiaallugillu ilisinissaq periarfissaasoq, peqataasinnaasulli amerlanerpaamik quliussasut. Pattattup peqataannginnissaa kissaatineqarsinnaavoq. Oqaluffimmi pisussat ataasiakkaarlugit nalilersussavagut, Aviaja Rohmann nassuiaavoq.
Qanigisaasulli kissaatigippassuk, ilisinissap kinguartinneqarnissaa periarfissaasoq, taassuma erseqqissarpaa.
- Nuummi kinguartitsinissaq periarfissaavoq, Sanami ineqarmat nillataartumik, toqusut inaannik. Siornatigut misilittareerparput, angallannerup unammillernartoqarneri pissutigalugit ilisinermi peqataasussat tikinnissaannut ullut arlallit utaqqisinnaaneq.
Apersortitsinerit
Maannakkumut apersortitsinerit siulliit aprilip 26-anut pisussatut suli pilersaarutaapput. Pisulli pissutigalugit allanngortitsisoqassappat, pilersaarutaagallartussamik suliaqartoqalereerpoq. Aviaja Rohmann ilisimatitsivoq apersortittussat atuartinneqarnerat unitsinneqareersimasoq.
Nuummilu innuttaasunut palasi kaammattuuteqarumavoq.
- Immitsinnut paarinissarput eqqaamasariaqarparput, taamatullu eqqaamallugu Guutip najormatigut.
Naalagiarnerit immiunneqareersimasut, radiokkut sapaammi suli tusarnaarneqarsinnaasassapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...