Innuttaasut peqatigiiffiillu aalisarnermik soqutigisaqartut piujuaannartitsineq tunngavigalugu aalisarneq pillugu oqallinnissamut marlunngornermi unnukkut qaaqquneqarput.

Oceans North Kalaallit Nunaat, imartatsinnik mianerinninnissaq imartattalu pisuussutaanik piujuaannartitsineq tunngavigalugu atuinissamik siunertaqartumik suliaqartoq, aalisarnermik susassaqartut tamanut ammasumik oqallinnertalimmik ataatsimiisippai.

Oqallinnermi peqataasut, KNAPK-p siulittaasua, Nikkulaat Jeremiassen, QAK-mit (Qalerualinniartut Aalisartullu Kattuffiat) Michael Skourup, Nuummilu tapertaralugu piniartut aalisartullu peqatigiiffianniit Peter Davidsen, aalisarnerup piujuaannartinnissaanut tamarmik iliuuseqarumallutik akuersorput. Tamannali qanoq ingerlanneqassanersoq pillugu assigiinngitsunik siunnersuuteqarlutik.

Pinngortitaleriffimmi aalisakkat qaleruallillu pillugit immikkoortortaqarfimmi pisortaq, Helle Siegstad qaleraliit milliartornerat pillugu siullermik saqqummiussaqarpoq. Aalisarnerli aqulluarneqarsinnaappat, aalisagaq siunissagissaartoq oqaatigalugu.

- Ilungersunarsinnaasunik aalajangiisoqarnissaanut peqataanissamut piareersimavugut, kingulitta aalisartuarnissaat qulakkeerneqassappat. Kinguaagut aalisarnermik inuussutissarsiuteqarsinnaanerat soqutigisatsinnut ilaavoq, QAK-miit Michael Skourup oqarpoq.

Aalisakkat allat pisarineqarsinnaasut

Nuummi tapertaralugu piniartut aalisartullu peqatigiiffiannit oqariartuut ilalerneqarpoq, aammali erseqqissarneqarluni aalisakkat allat aamma aalisarneqarsinnaasut:

- Aalisartumut aningaasaqarnikkut napatitsineq aamma oqaluuserineqarpoq. Saarullik isigigutsigu, saarullippassuupput, akiali appasilluni. Aalisakkat akii nalimmassarneqarpata, tunitsiveqarnerillu inerisarneqarpata, aalisartunut aalisakkat allat periarfissanik ulikkaarput, Peter Davidsen NTPAP-mit oqarpoq.

Aalisarnermut Naalakkersuisoq, Karl Tobiassen, oqallinnermi peqataasussaagaluartoq, Inatsisartuni suliaqarnini pissutigalugu takkussinnaanani piffissaq kingulleq nalunaartariaqarsimavoq.

Oqallinneq aalisarneq pillugu ataatsimiititaliarsuup innersuussutai, suliaqartullu saqqummiussaat tunngavigalugit ingerlanneqarpoq.

Meqqilersuinissamut aqqut

Aalisakkap MSC-imik meqqilerneqarsinnaanera aamma oqaluuserineqarpoq. Peter Davidsen isumaqarpoq inuussutissarsiornerup iluani MSC-imik meqqeqartitsinissaq soqutigineqarluartariaqartoq.

- Pisisartut kissaatigivaat, taamaammallu aalisartut soqutigilluinnartariaqarpaat inuuniutertik MSC-mik meqqeqartinneqalernissaa. Taamaaliornikkummi pisat ikinneruleraluarpataluunniit isertitat suli pitsaanerusinnaapput, isumaqarpoq.

Aalisarneq piujuaannartitsinermik tunngaveqassappat sineriak tamakkerlugu aalisarfittut aqutsivinngussasoq, KNAPK-mi siulittaasoq isumaqarpoq.

- Nunarput pisuussutinik ulikkaarpoq. KNAPK-mi suliniutigivarput sineriak tamaat aqutsivinngortinneqarnissaa, taamaasilluni pisat pisuussutinut nalimmassarnerulissammata, sumiiffinnilu aalajangersimasuinnarni aalisarneq qimanneqarsinnaaniassammat. Taamaaliornikkut aalisarneq piujuaannartitsinermik tunngaveqalissasoq isumaqarpugut, Nikkulaat Jeremiassen oqarpoq.

QAK-miit Michael Skourup isumaqarpoq MSC-mik meqqeqartitsilernissamut suliaq imaaliallaannaq naammassinavianngitsoq. Taamaattoq meqqiup atulernissaanut sulilernissaq ukiut arlaqassagaluarpataluunniit, aallartittariaqarsoraa.