Oqallissaarut: Angajoqqaat qanoq akisussaaffilerneqassappat

-

Qularutiginngilarput Kommunet isumaginninnikkut suliassat atugassarititaasut iluanni sapinngisannguaminnik suliassatik suliarisaraat naammassiniartarlugillu. Ajoraluartumilli naliliisariaqarpugut angajoqqaat amerlasoorujussuit meeqqaminnik sumiginnaasarnerat isumaginninnikkut sulinerup nukillaartitaalerneranut peqqutaaqataangaatsiartoq.

Inuit Ataqatigiinnit Aqqa Samuelsen aamma Stine Egede tusagassiutinut nalunaarummik allapput.

- Isumaqatigiissutigivarput inuiaqatigiinni pingaarnerpaaq tassaammat meeqqat isumagilluarneqarnissaat. Ajoraluartumilli takussutissanik amerlaqisunik peqarpoq angajoqqaat meeqqaminnik sumiginnaasarnerannik, tamannalu aaqqissuussaanikkut isumaginninnikkut sulinermut arngalisititseqataasinnaavoq, IA-mi politikerit isumaqarput.

- Naalakkersuisut kaammattussavagut Kommunet suleqatigalugit suleqatigiissutinik nuna tamakkerlugu meeqqat sumiginnarneqartut eqqarsaatigalugit sulisussamik pilersitseqqullugit. Naalakkersuisut aamma kaammattussavagut kommunet suleqatigalugit aqqutissanik nutaanik ujarleqqullugit, nukissanik meeqqanik sumiginnarneqartunik sulinermi tapertaalluarsinnaasunik.
Itisiliisumik ilisimavittariaqarparput suna tunuliaqutaalluni meeqqat taama amerlatigisut sumiginnarneqartarnersut. Aaqqissuussaanikkut ajornartorsiutit ammasumik oqaluuserinissaannut aqqutissiuussisumik aammalu siunissamut isiginnittumik iliuusissanik pisortat neqeroorutigisinnaasaannik aqqutiissiuussilluta suliaqartariaqarpugut.

Ajornartorsiutit ammasumik oqallisigineqarnissaat neriutiigineqarpoq.

- Maannalu ammasumik oqaluuserisariaqalerparput Nunatsinni inuuusuttut inersimasullu meerartaareernerminni qitornaminnik assigiinngitsumik patseqartumik isumaginnissinnaanngitsut sooq taama amerlatiginersut.
Qularutigineqassanngilaq Inuit Ataqatigiinniit isumaqaratta angajoqqaat qitornaminnik isumaginnissinnaanngippata pisortat tassaammata qaqugukkulluunniit meeqqanik illersuisussat.

- Kommunet nersualaarusuppagut suliassamik annertoorujussuarmik isumaginnimmata. Aamma Meeqqat Illersuisuat MIO nersualaarusupparput meeqqat atugaat pillugit misissuisarnerinut uppernarsaasiortarneranullu, aamma pisortat suleqatigalugit meeqqanik illersuinissaq sulissutigiuarmassuk.

- Sinerissami meeqqat atugaat pillugit misissuinernut uppernarsaassersuinermullu MIO siuttuusimavoq sulilu siuttuulluni. Maannamullu sulinerat tunngavigalugu iluarsisariallit suuneri pillugit ilisimasanik annertuunik ilisimasaqalersimalluta. Ujartugarpulli tassaavoq pisortanit iliuuseqarneq.