Oqallisissiaq: Pinngortitaleriffimmut ilisimatusartut amerlanerit

Aalisagaqatigiiaat pillugit kikkut ilisimasaqarnerpaappat. Biologit imaluunniit aalisartut, pinngortitamut qanimut attaveqartut?

Pisassiissutit, piujuartitsineq isumatusaartumillu aalisarnermik aqutsineq pineqalersillugit apeqqut tamanna akuttunngitsumik saqqummiunneqartarpoq.

Ilisimatusartut amerlanerit

Tamatumunnga atatillugu Pinngortitaleriffik Aalisarneq pillugu Ataatsimiititaliarsuarmut naliliisimavoq, ilisimatusartunik teknikkimik, paasissutissanik katersisarnermik suliarinnittarnermillu immikkut ilisimasalinnik sulisoqalernissaq pisariaqartoq.

Pinngortitaleriffik 2021 ilisimatusaammik nutaamik umiarsuartaassaaq avataasiorluni nakkutilliinermik suliassanik suliarinnittussamik. Umiarsuaq Pinngortitaleriffiup maannamut suliaanut sanilliullugu suliassanik nutaanik allanillu ammaassissaaq.

- Umiarsuaq pitsaanerpaamik iluaqutiginiarlugu uumasoqatigiinnilu siunnersuinermut sakkortunerusumik pullaveqarnissaq qulakkeerniarlugu piginnaasat nutaat atorfissaqartinneqarput, Pinngortitaleriffik paasissutissiivoq.

Aalisarneq pillugu Ataatsimiititaliarsuaq oqallisissiami paasissutissiivoq, Pinngortitaleriffiup oqallisissiataa naliliiffiginissaanut suli maannamut periarfissaqartoqarsimanngitsoq.

Aningaasaqarnikkut sinaakkutissat

- Taamaakkaluartoq aalisarneq pillugu suliassaqarfimmi ilisimatuussutsikkut siunnersuinermut tunngavissanik naammattunik peqarnissamut aningaasaqarnikkut sinaakkutissanik pisariaqartunik qulakkeerinnissimanissaq aassut pingaaruteqarpoq, matumani suliassaqarfiup inuiaqatigiinnut annertuumik sunniuteqartarnera eqqarsaatigalugu, Aalisarneq pillugu Ataatsimiititaliarsuaq allappoq, erseqqissaallunilu ”uummassusilerituut, atuisut aqutsisullu akornanni suleqatigiinnerit pitsaasuunissaat aammalu uumassusilerituut siunnersuisarnerisa arlaannaanulluunniit attuumassuteqarani ingerlanneqartuarnissaa kiisalu uummassusilerituut qinikkallu akornanni attuumassuteqarani ingerlatsinerup attanneqartuarnissaa” pingaaruteqartut.

Isumalioqatigiissitap eqqarsaatersuutigigallagai tunngavinnik pingasunik tunngaveqarput:

• Siunissami ungasinnerusumi aalisagaqatigiit kinguaassioqqinnissaannik qulakkeerinnittussat TAC-ip aamma pisassiissutit amerlassusiisigut sippussanngilaat.
• Aalisagaqatigiit aallaavigalugit biologit siunnersuinerat pitsaalluinnartoq.
• Pisarisinnaasatigut nikerarnerit malillugit biologit siunnersuinerannit imminermini oqimaaqatigiisitsisuusoq aallaavigalugu TAC-imik aalajangersaaneq naapertorlugu 31 aalisagaqatigiiaanut pingaarutilinnut tamanut ingerlatsinissamut pilersaarutinik, ilisimatuut, atuisut ingerlatsisullu akornanni inerisarneqarsimasunik, inatsisinngortitsilluni naqissusiineq. Tassa imaappoq aqutsinissamut pilersaarutinut tunngatillugu akuliutinnginnissamik tunngavik atorneqartariaqarpoq.

- Ilisimatuut, atuisut aqutsisullu akornanni suleqatigiinnermut iluserititat, siuliini allanneqartut sinaakkutit iluini, inerisaqqinneqarnissaat pisariaqartinneqarpoq. Tamanna nunat tamalaat akornanni periuserineqartartut nalinginnaasumik akuerineqarsimasut aallaavigalugit pisariaqarpoq, Ataatsimiititaliarsuaq uumasoqassutsikkut piujuartitsineq siunissamilu aalisarnermik aqutsinermut tunngavissaq pillugu apeqqutinut atatillugu allappoq.