Oqallinneq sakkortuseqqeriaannarluni nangeqqippoq: »Pinnguanngilagut. Pimoorussivugut«
Naalagaaffeqatigiinniuna susoqartoq? Aki-Matildap Folketingimi aalassatsitsereernerata kingorna isummersuutit imaaginnavipput. Kalaallit Nunaanni Danmarkimilu politikerit misilittagaqarnerpaat ilaat oqallinneq pillugu AG-p oqaloqatigai.
Qujageqqusaarnerua, meerarpalunneq imaluunniit politikkikkut sakkortuumik oqariartuuteqarluni ukkatarinerunissaq anguniarlugu?
Aki-Matilda Høegh-Damip folketingimi ilaasortat ataatsimiittarfianni oqalugiaataa pillugu isummersuutit imaaginnavipput. Oqaaseqareernerata kingorna Kalaallit Nunaata Danmarkillu ataqatigiinnerat pillugu ukiuni kingullerni aatsaat taama oqallisigineqartigeqqilerpoq.
Aviisi AG taama allappoq.
»Naalagaaffeqatigiinneq nuannarilluinnarlugu ataatsimoorluni kivitseqatigiiffiummat« SF-imiit folketingimi ilaasortaq Karsten Høngep naqissuserpaa. Aki-Matilda Høegh-Damilli iliusaa ilungersunaralugu.
- Pisariaqanngitsumik aporaaffissarsiornerusoq isumaqapunga, Hønge oqarpoq. Taanna kalaallit politikkia ukiut 40-t sinnerlugu malinnaaffigaa.
- Folketingimi nutserisoqalernissaanik kissaataa taperserpiuk?
- Ammaffigaara. Akimullu oqaatigaara nammineerluni Folketingip siulittaasoqarfianut anngutissagaa nassuiarlugulu suut nutserneqartassanersut. Naalagaaffeqatigiinnerup ukiumoortumik oqallisigineqarnera imaluunniit oqallinnerit kalaallit ilaasortat tamaasa peqataaffigisinnaasaat? Knallertinut oqallinnernut aamma atuutissava?, oqarpoq.
- Nalunngilammi Kalaallit Nunaanni Inatsisartuni taamatut ingerlariuseqartoqartoq? Tassa suut tamarmik nutserneqartartut?
- Aap, nalunngilara. Kisianni Akip kissaatini nammineerluni apuutissagai isumaqarpunga. Siulittaasoqarfimmi qallunaat politikerit tallimat peqatigalugit eqqartuerusunngilanga aalajangiillungalu kingornalu naveerneqarlunga, Karsten Hønge akivoq. Taanna Folketingip siulittaasoqarfiani siulittaasumut tullersortit pingajuattut atuuffeqarpoq.
Aviisimi AG-mi atuarnerusinnaavutit. Aviisi uani pissarsiariuk:
