Oqallinneq pimoorullugu ingerlalerpoq: Kina kalaaliua?
Kikkut kikkuuppat? Apeqqutip partiit sassarternissamut pinngitsaalivai. Najugaq, ilalisaatit, akileraarutit, ilaquttat allalluunniit apeqqutaappat? Politikeri nammineq tunuliaquttaminik saqqummiussivoq.
Inatsisartuni oqallinneq siunissami takornariaqarnermik inuussutissarsiutip aaqqissuunneqarnissaanut tunngasussaagaluarpoq, kisianni piffissami matumani naleqartitat pillugit politikkikkut oqallinnermi apeqqutit sakkortunersaat qitiutinneqalertorpoq: Nunaqavissoq – imaluunniit kalaaleq – qanoq nassuiarneqassava?
Aviisi AG taama allappoq.
Pingaartumik Pele Broberg oqallinnermi kimigiisarpoq. Eqqartuussissuserisut Amerikami eqqartuussivinni ilungersuummernartuliani tv-iikkut takusartakkatta ilaattut sassarterpoq; sammisamik malartaalluni qaqileriuaannartutut.
- Kikkut nunaqavissuunerat qanoq ilillusi aalajangersarniarpisiuk? Najugaqarneq tunngavigalugu, nunaqaqqaartutut innuttaasut pineqarpat? Kikkut nunaqavissuunerannut nassuiaat suna atorneqassava? Pele Broberg partiit oqaaseqartuinut assigiinngitsunut malartaalluni oqarpoq.
Siumoorneqartoq
Naleqqamit kalaallisut kinaassuseq pillugu oqaluuserisassanngortitaa (arlaleriarluni kinguartinneqartoq) Upernaakkut Ataatsimiinnermi aatsaat sapaatip-akunnerata tulliani – marlunngornermi maajip 24-ani – pisortatigoortumik oqaluuserineqartussaagaluarpoq. Kisianni soormi periarfissaq takkummat oqallinneq siumuuginnaraanni?
Sammisap eqeersimaarluni ingerlaannaq oqaluuserilernissaanut qanittukkut periarfissamik takkuttoqarmat politikeri Naleqqameersoq immaqa taama eqqarsarsimavoq.
Tamanna takornariaqarneq pillugu oqaluuserisassami, Siumup gruppiata oqaluuserisassanngortitaata, siunnersuummi oqaatigineqartutut, qanoq ililluni »takornariaqarnermi suliffeqarfiit ingerlatani nalunaarusiakkut qulaajassallugit, qanoq iliornikkut nunaqavissut inatsisitigut allaffisornikkut aaqqissuussaanertigullu il.il sunniuteqarnerpaamik aalajangiisinnaalernissaat,« qulakkeerneqassasoq oqaluuserineqarnerani pivoq.
IA-p oqaaseqartua Agathe Fontain oqaaseqartuni siullersaalluni Pele Brobergimit aperineqarpoq: Kikkut nunaqavissuupput?
- Aasakkuinnaq maaniittaraanni nunaqavissutut isigineqartoqarsinnaanngilaq. Taamaattumik maani inunngorsimanissaq imaluunniit ukiuni aalajangersimasunik amerlassusilinni najugaqarsimanissaq pillugu inatsisini sinaakkutinik aalajangersaanissaq pingaaruteqarpoq, Fontain akivoq.
Aviisimi AG-mi atuarnerusinnaavutit. Aviisi uani pissarsiariuk: