ilisimasat nutaat

Oqaatsinut politikki misissuiffigigaat

Niuernermik Ilinniarfimmi TNI-mi ilinniartut Sermitsiaq.AG atorlugu nunatsinni oqaatsinut politikki atuunnersoq, aamma qanoq amerlatigisut atortarneraat paasiniaapput

Frederik Enoksen, Eva Petrussen, Nikki Poulsen aamma Vilhelmiinannguaq Sommer, Niuernermik Ilinniarfimmi TNI-mi ilinniartut misissuineq suliaraat

Niuernermik Ilinniarfimmi TNI-mi SK1-imi ilinniartut sisamat kalaallisoornermi, ilinniariaatsimi inuiaqatigiilerinermilu atuartinneqarnerminnut atatillugu nunatsinni oqaatsinut politikkimik paasiniaapput.

Ilinniartut sisamat taakkua sammisaqarnerminni tamanna allaaseriniarpaat.Ilinniartut taakkua sisamat tassaapput: Frederik Enoksen, Eva Petrussen, Nikki Poulsen aamma Vilhelmiinannguaq Sommer.

Atuuppa?
- Siunertaraarput Kalaallit Nunatsinni oqaatsinut politikki inuinnarniit imaluunniit suliffeqarfinni atorneqarnersoq paasiniassallugu, Frederik Enoksen, ilinniartut sisamaasut ilaat oqarpoq.

Paasiniaaneq immersugassaq atorlugu misissuinertut Sermitsiaq.AG-mi pingasunngornermi novembarip 25-aniit pingasunngornermut decembarip 2-anut ingerlanneqassaaq.

– Paasiniaanermut peqataasut ataqqivavut, taamaalillutillu akissutaat kinaassusaat ersersinneqassanani. Aalajangersimasumik amerlassusiliinnaat atussavavut, soorluttaaq oqaatsinut politikkip sinerissami illoqarfinni aamma Nuup akornanni atorneqarnera assigiinngissuteqarnersoq paasissallugu soqutigigipput. Taamaattumik peqataasut sumi najugaqarnerminnik paasissutissiinissaat pingaaruteqarpoq, Frederik Frederiksen oqarpoq.

Suliakkiissut
Taassuma aamma ilisimatitsissutigaa, paasiniaanerullu inernera ilinniartunit Niuernermik Ilinniarfimmi suliakkiissummut atorneqassasoq, soorluttaaq Nuummi Niuernermik Ilinniarfimmi saqqummiussinermut decembarip 7-ani atorneqarumaartoq.

Sermitsiaq.AG ammaraanni saqqummertartoq aqqutigalugu misissuinermi apeqqutit elektroniskiusumik immersorlugit peqataasoqarsinnaavoq.

Powered by Labrador CMS