Oqaasissaminik mianerinnittartoq Kofod nangaanani oqaaseqartartumit Løkkemit taarserneqarpoq
Danmarkimi nunanut allanut ministeeriaqarfik suliarpassuarik Kalaallit Nunaannut attuumassuteqartartunik suliaqartarpoq, taamaammat Lars Løkke Rasmussenip nunanut allanut tunngasutigut ministeritut suliassaminik qanoq isumaginnissanersoq malinnaaffigissallugu soqutiginassaaq, Kalaallimmi Nunaat pillugut aaqqiagiinngissitsilersinnaasunik nangaassuteqarani oqaaseqarsinnaasutut ilisimaneqarami.
Danmarkimi naalakkersuisunngortitsinermut atatillugu ministeriunerusimasoq Lars Løkke Rasmussen Danmarkimi politikkimi qitiusumik suliassaqartutut inissisimaqqilerpoq.
Partiimi Moderaternemi siulittaasuuvoq, maannalu nunanut allanut tunngasutigut ministerinngorluni.
Lars Løkke Rasmussen politikkeriuvoq assortuutitsilersinnaasoq, aamma maani nunami. Assersuutigalugu folketingimi ilaasortap Aki-Matilda Høegh-Damip (S) Lars Løkke Rasmussenip Kalaallit Nunaannut tunngatillugu politikkeqariaasia isorilluinnarpaa, akerlianilli Aaja Chemnitzip (IA) ministeriunerusimasup Kalaallit Nunaanni inuussutissarsiuteqarnermut atatillugu iliuuserisarsimasai pitsaasutut isigai.
Soqutiginarluinnassaarlu Lars Løkke Rasmussenip nunanut allanut ministeritut qanoq iliuuseqartarumaarnera takussallugu, Ilisimatusarfimmiittumi Nasiffimmi lektoriusoq Rasmus Leander Nielsen oqarpoq.
Kofod oqaasissaminik mianerinnittartoq
Lektorip oqaatigaa, Løkkep kingoraangaa Jeppe Kofod (Soc.) naalakkersuisuuffimmi kingullermi Kalaallit Nunaannik suleqateqarnermi naammassisaqarusuttuusarsimasoq, akerlianilli Lars Løkke Rasmussen ukiut arlallit ingerlaneranni Kalaallit Nunaat pillugu uissuumminartunik oqaaseqartartut maluginiarneqartarsimalluni:
- Lars Løkke naalagaaffeqatigiinnermut atatillugu nangaassuteqannginnerusumik oqaaseqartarsimavoq, Jeppe Kofodili unammillernarsinnaasut ilaannut atatillugit oqaasissaminik mianerinninnerusarpoq, unammillernartullu pillugit Kalaallit Nunaannukarluni ataatsimeeqatiginnikkiartortarpoq, oqaasissanilu mianerinerusarlugit, Rasmus Leander Nielsen Sermitsiaq.AG-mut oqarpoq.
Lektorip assersuutigalugu oqaatigaa, Future Greenland ukioq manna Nuummi ataatsimeersuartitsimmat Løkke Kalaallit Nunaanni qanoq iliuuseqartoqartariaqartoq qanorlu iliuuseqartoqartariaqanngitsoq pillugit isummaminik erseqqissumik oqaaseqarsimasoq. Danmarkimi politikkerit Kalaallit Nunaani pissutsinut taamatut 'akulerukkaagata' Kalaallit Nunaanniit nuannarineqarpallaarneq ajorput.
Oqaaserisartagai aaqqiagiinngissitsilersartut
Løkkeli pissutsinut allaanerusumik isiginnittartuuvq, ukiunilu kingullerni oqaatigisarsimavaa, assersuutigalugu Kalaallit Nunaanni meeqqanik innarliisarnermi ajornartorsiutit oqaluuserineqarnissaannut Danmarkimit tunuarsimaartoqartariaqanngitsoq. 2020-mi aasakkut "Kalaallit Nunaata namminersulivinnissamik takorluugaqarnini puiguinnarsinnaavaa. USA-mimmi tamanna pinaveersaartinneqassaaq" oqaatigimmagu aamma uissuummititsisimavoq.
Nangaassuteqarani oqaaseqartarnera eqqarsaatigalugu Rasmus Leander Nielsenip nalilerpaa, naalagaaffeqatigiinnermut ilisimaqarluartoq nunanut allanut tunngasutigut ministerinngornera iluaqutaalluarsinnaasoq, danskimmi naalakkersuineranni nunanut allanut tunngasutigut ministerit apeqqutinik Kalaallit Nunaannut tunngassuteqartunik isumaginnikkajuttuusarmata.
- Aallaqqaataaniit aatsaat aallartittussaannginnera iluaqutaalluarsinnaavoq. Ministeriusarsimasummi tamatumannga isumaginninnissamut piareersimarpiartarsimannginnamik.
- Akerlianilli oqaaserisartagai aaqqiagiissinngitsilersinnaasarput, taamaammat suleqatigiinnerup qanoq ingerlanissaa takussallugu pissanganarpoq. Tassunga atatillugu Lars Løkke inuk qanoq ittuunersoq takujumaarparput, Rasmus Leander Nielsen oqarpoq.