Oqaasilerituumut Islandimit nersornaat akimasoq
Katti Frederiksenip oqaatsivut pillugit qasutsuilluni sulinera maanna nunani tamalaani nersornaaserneqarpoq.
Katti Frederiksenip Vigdís nersornaat Vigdís Finnbogadóttir sisamanngormat pissarsiaraa, taanna præsidentiusimasup inuuiani tunniunneqartarpoq, taassumalu “oqaatsinut kulturimullu maligassiuisuunera” malunnartinneqartarluni.
Suliaq arajutsisassaanngitsoq
- Kattip kalaallit oqaasii pillugit apeqqutinik nunami namminermi nunanilu tamalaani malugititsisarnera arajutsisassaanngilaq. Taalliatigut, ilisimatusarnikkut, meeqqanut atuakkiornikkut tamallu oqallinneranni peqataanermigut kalaallit oqaasiisa kalaallinut inuiaqatigiinnut qanoq pingaaruteqartigineri qasusuilluni erseqqissarpaa, Katti Frederiksenip akimasumik nersornaaserneqarneranut tunngavilersuineq taama oqaasertaqarpoq, taanna Islandip naalakkersuisuisa, Islands Universitetip aamma allamiut oqaasiinut Vigdís Finnbogadóttir Institutip tunniussaraat.
Nersornaaserneqarami attortittoq
Katti Frederiksen nersornaaserneqarami tupallunilu attortissimalluni, KNR-imut ilisimatitsivoq, taamma Islandimiut aningaasaataannik 6 millionit koruuninik, tassa 300.000 danskit aningaasaannik checkitaqarpoq.
- Qujamasuppunga maannamut suliniutigisartakkakka malugineqarsimammata aamma nunatta avataaniit. Nukissanik tunisivoq aamma kajuminnera soorlu sakkortusarneqaannartoq ikummarissarneqartutullusooq iinnartoq, taanna KNR-imut oqarpoq.
Atuakkiortoq oqaatsinillu ilisimatusartoq Katti Frederiksen, ukiorpassuarni Oqaasileriffimmi atorfeqartoq, ilinniartitaanermut, kulturimut ilageeqarnermullu 2020-mi novembarimi naalakkersuisutut toqqarneqarpoq. Taanna apriilip arfernanni qinersinermut qinigassanngortinngilaq.