Oqaasileriffiup isikkat inuai tamaasa taaguuteqalersippai
Isikkatta inuaanni putugoq kisimi maanna taaguuteqarunnaarpoq. Tassami oqaasiliortut isikkat inuaasa taaguutaannik siunnersuut akueraat.
Ukiuni arlalinngortuni isikkatta inuaasa taaguutaat pillugit Oqaasileriffimmut saaffiginnittoqartuarsimavoq. Kisianni putugoq eqqaassanngikkaanni apeqqut akiuminaattarsimavoq.
- Taaguutigititatuarpulli tassaavoq putugoq. Isikkamiittut inussat allat pineqaraangata sumiinnera nassuiartariaqartarparput, assersuutigalugu ’putukkup sanianiittoq’ imaluunniit ’inuak mikineq’, Oqaasileriffik Facebookimi taama nassuiaateqarpoq.
Siunnersuuteqartoqartoq
Isikkat inuaasa taaguutissaannik siunnersuuteqartoqarnera iluatsillugu Oqaasiliortut taakkua siunnersuutaasut akueriniarlugit aalajangerput. Tassa isikkap inuai ima taaguuteqalerput: Putugoq, tikeraq, qiterleraq, mikileraq (isikkami mikileraq) aamma eqeqqoraq.
Isikkatsinni inussat taaguuteqannginnerat immaqa patsiseqarsimassaaq nuisajuaannanngimmata, aammalu arlaanut aalajangersimasunut immikkut atuuffeqaratik, Oqaasileriffik taama ilisimatitsivoq.
- Naggueqatitta aamma isikkatta inuaat immikkut taaguuteqartinngilaat, soorluttaarmi aamma oqaatsini allani, soorlu danskisut, taamaallaat storetå aamma lilletå, taaguutitut atoraat, sinnerilu immikkut taaguuteqaratik, Oqaasileriffik allappoq.