Oqaasileriffik kalaallit oqaasiinik katersaqalersoq
Oqaasileriffiup nittartagaani allagaatit oqaasertaat misissuiffigineqarsinnaalerput.
Oqaasileriffiup allagaatinik katersuivia (korpus) kalaallisut oqaatsinik 18 millioninit ikinnerunngitsunik imaqartoq maanna ujarlerfigineqarsinnaalerpoq.
Allagaatinik katersuiviup imarisai ilaatigut tassaapput atuakkiat, taalliat, aviisit, atuagassiat, nittartakkat inatsisillu oqaasertaat, tusagassiutinut nalunaarummi ilisimatitsissutigineqarpoq.
- Allagaatinik katersuivik (Korpus) pingaarnertut kalaallisut oqaatsinik misissuinermut atugassanngorlugu suliaavoq. Oqaatsit, oqaaseqatigiit, nagguiit, uiguutit, naanerit oqaasilerinermulluunniit tunngasut allat ujarneqarsinnaapput misissuiffigineqarsinnaallutillu.
Oqaatsinik misissuisioqarsinnaalerpoq
Allagaatinik katersuivipput kalaallisut oqaatsinik misissuerusuttunit tamanit, soorlu oqaasilerisunit, ilinniartitsisunit, tusagassiortunit soqutiginnittunillu allanit tamanit atorneqarsinnaavoq.
Oqaasileriffik 2014-imi aviisitoqqanik pdf-iusunik Timarit.is-imit pissarsivoq. 2015-ilu naajartulersoq allagaatinik katersuineq aalajangersimasumik akisussaasoqartinneqarluni aallarnerneqarsimavoq.
- Timarit.is-imit pissarsiarineqartut ilaat katersuinermi aallarniutigineqarsimapput, ukiunilu siullerni marlunni Atuagagdliutit 1952-ip 1955-illu akornanni saqqummersartut oqaasertaat Oqaasileriffiup allattaasitaamut nuutsissutaa atorlugu katersorneqarsimapput. Tamatuma kingornagut atuakkiat, taalliat, aviisit, atuagassiat, nittartakkat inatsisillu oqaasertaat katersorneqarput.