Oqaaseqartartoq: Siulittaasussatut piukkunnartut marluupput

Naleqqami nuimasut Pele Broberg imaluunniit Jens Napaattooq Hans Enoksenip partiimi siulittaasuattut taartissaattut marluullutik piukkunnartuupput.

Christian Schultz-Lorentzen isumaqarpoq, Pele Brobergi Naleqqami siulittaasutut Hans Enoksenimik taarsiinissamut piukkunnartut ilagigaat.

Naleqqami siulittaasoq Hans Enoksen inuttut inissisimanini pissutigalugu partiip siulittaasuatut tunuassalluni aalajangersimavoq, partiimit ataasinngornermi nalunaarutigineqarpoq.

Hans Enoksen Kalaallit Nunaanni piffissami nutaajunerusumi politikkerit annersarisimavaat: ”nunaqarfinnik illersuisoq” Siumumi Naalakkersuisunilu aamma siulittaasuusimavoq.

Siulittaasutut kingornussisussat - pisortagigoortumik pisortatigoortuunngittumillu - oqallisigineqareersimassasut, politikkikkut oqaaseqartartoq aamma aviisimi AG-mi aaqqissuisuuneq Christian Schultz-Lorentzen, partiimi kingullermik Inatsisartunut qinersisoqarmat sisamanik isertitaqartumi aamma arlaleriarluni naalakkersuisuutitaqarsimasumi kina siulittaasunngussanersoq pillugu aalajangiisoqarniassammat immikkut ittumik ataatsimeersuartoqapallattoqarnissaanik naatsorsuutiginnittoq isumaqarpoq.

Pingaartumik nuimanerpaat marluk siulittaasussatut piukkunnarsinnaapput.

- Partii arnamik siulittaasortaarsinnaappat, tamanna partiimut tulluassagaluarpoq. Siorna Inatsisartunut qinersisoqarmat arnanit 30-usunit partii sinnerlugu sassartunit sisamaannaat Inatsisartunut qinigaapput. Naleraq tamatuma tungaatigut kinguussaaqqavoq. Kirsten Fenckeri siulittaasutut toqqarneqartuuppat, immaqa arnat amerlanerit partiimik qinersisalissagaluarputt.

- Taamatulli ajornanngitsiginissaa ilimananngilaq. Partiimimi nuimanerpaat marluk, tassaasut Pele Broberg imaluunniit Jens Napaattooq ilimanarnerpaapput. Allamimmi siulittaasunngortoqassappat tupaallatsitserujussuartussaapput, Christian Schultz-Lorentzen kingullertut taaneqartumik ilimagisaqarnerusoq oqarpoq.

"Inuppalaartupilussuaq" taarsissagaa

- Jens Napaattooq politikkikkut suliaqarnermi sivisunerusumik misilittagaqartoq partiimi politikkikkut oqaaseqartartuuvoq, piffissallu assortuiffiusup kingorna napparsimasimanini qaangersimallugu. Pele Brobergili politikkeritut suliaqalerami politikkikkut qularnaatsumik oqaaseqartuartarsimavoq. Taakku marluullutik piginnaasaat imminnut assigiitsorujussuupput. Taakumi politkkerit marluullutik oqaaseqarluarsinnaallutillu politikkimmi assigiinngisitsisinnaapput.

- Assigiinnisitsisinnaasariaqarpullu. Inuppalaartupilussuarmimmi, soorlu Enoksenitut ittumik, politikkikkut pissaaneqarnermini kisimiilluni sorsuuteqartartumik taarsiissagaanni tamanna piginnaaneqarfigineqartariaqarpoq, aammali Hans Enoksenip inuttutu nukittussuseqarneratut inuttutu piginnaasaqartariaqarlutik, Christian Schultz-Lorentzen oqarpoq.

Partiimi siulittaasumik taarsiisarneq tamatigut ajornaatsuinnaasanngilaq. Demokraatini qanga Jens B. Frederiksen Per Berthelsenilu siulittaasunngorniummata partii ajalusuungajavinnikuuvoq. Siumumi aamma tamatut sakkortuumik siulittaasunngorniuttoqarsimavoq. Tamatuma malitsigisaanik qinersisartunik annaasaqartoqarsimalluni, partiilli taakku marluullutik ingerlaqqereersimapput.

- Siulittaasunngorniuttoqartarnera oqartussaaqataanermut iluaqutaajuaannarpoq. Naleqqami ilaasortat qinigassaat amerlanerusariaqarput. Tamaviaartoqassaaq. Tamaviaarnerli ajunngitsumik ingerlanneqarpat, tamatuma kingorna suleqatigiittoqalissaaq. Partiip iluani akerleriittoqaraangat partii sunaluunniit ajornartorsiulertarpoq. Partiimit unammilligassap nutaap taassuma qanoq isumagineqarnera malinnaaffigissallugu soqutiginassaaq. Politikkimi ilisimaneqartutut oqitsuinnaasanngilaq, Naleqqamilu arlaannik tapersersortissarsiortarneq ileqquunani. Partiip 2014-imi pilersinneqarneraniilli siulittaasussamik nutaamik aatsaat qinersisoqartussanngorpoq, Christian Schultz-Lorentzen oqarpoq.

Powered by Labrador CMS