Oqaaseqartartoq: Múte piffissaarutilerpoq

Ukiakkut ataatsimiinneq aqangu aallartissaaq, Naalakkersuisulli siulittaasuata Brobergi pillugu suliaq politikkikkut kinguneqartinneqassanersoq pillugu nalunaaruteqarnissaa innuttaasunit amigaatigineqarpoq.

Piffissaq ingerlavoq, eqqortumilli aalajangiinissamut piffissaqarluarnissaq pingaaruteqaraluartoq kingunerlussinnaavoq. Ukiakkut ataatsimiinneq aqangu aallartissaaq, nunalli aqunneqarnera pillugu politikkikkut inissisimaneq erseqqissumik nalunaarutigineqanngipppat, naalakkersuinikkut sulineq ajoquserneqarsinnaavoq.

- Múte B. Egede ullumi kingusinnerpaamilluunniit aqangu ullaakkut nalunaaruteqartariaqartariaqartoq eqqarsaatigineqarsinnaavoq, Christian Schultz-Lorentzsen aviisimi AG-mi politikkikkut oqaaseqartartoq aaqqissuisuunerusorlu Brobergip oqaaserisimasaasa malitsigisaanik politikkikkut uivertoqarnera oqaaseqarfigalugu oqarpoq.

Aaqqissuisuunerup oqaatigaa, Inatsisartut ukiakkut ataatsimiilerpata pingaarutilinnik politikkikkut siunnerfeqartoqarnera aningaasaqarnermullu tunngatillugu aalajangiisoqartussaanera pissutigalugit piaarnerpaamik paasissutissiisoqarnissaa pingaaruteqartoq, ukiakkummi ataatsimiinnermi pingaartumik aningaasanut inatsisissaq - nunap aappaagu aningaasaqarnissaa - akuersissutigineqartussaammat.

Pingaarutilipilussuit oqaluuserineqartussaasut

Aqangu Inatsisartut siulittaasussaannik taasisoqarlunilu Naalakkersuisut siulittaasuat ammaanersiorluni oqaaseqartussaavoq.

- Múte B. Egede ukiakkut ataatsimiittoqarnissaa sioqqullugu naalakkersuinikkut ajornartorsiummut aaqqiissutaasinnaasunik saqqummiussinngippat aamma - ilungersunartumik inissisimasoqarneranik - nassuerutiginnilluni politikkikkut aqutsisuunini takutinngippagu, ukiakkut ataatsimiinnermik aammaanersiornerup qanoq ingerlarnneqarsinnaanera takujuminasttupilussuuvoq, Christian Schultz-Lorentzen oqarpoq.

Múte B. Egede ullut tallimat matuma siornatigut tusagassiorfinnut nalunaaruteqartariaqarsimavoq, tassanilu naalakkersuisuutitami Naleqqameersup Pele Brobergip namminersulivinnissaq pillugu inuit Inunnit aallaavillit kisimik taasisinnaatitaassanersut pillugu aviisimut Berlingskemut oqaaseqarsimaneranut naqqiuteqartariaqarsimalluni.

Mútep nalunaaruteqarnissaa utaqqineqartoq

Politikkikkut uivertoqarnera naalakkersuisooqatigiinnik isumaqatigiinngissuteqartitsilerpoq.

- Múte B. Egede tamanna pimmalli ulapingaatsiarsimavoq, innuttaasullu tamarmik qanoq angusaqarsimanissaa pissangallutik utaqqivaat. Naalakkersuisooqatigiinni nikisitsisoqassanersoq oqaloqatigiissutigineqarsimanissaa qularutissaanngilaq. IA-mili politikkikkut nuimanerit nunanut allanut tunngasutigut naalakkersuisuuneq Naleqqamut tunniunneqaqqinnginnissaanik kissaatillit, partiinik allanik naalakkersuisooqateqartoqarsinnaanersoq misissorsimasinnaavaat, tassa politikkikkut tamanna qanorluunniit ajornarpasitsigisutut isikkoqaraluarpalluunniit, Christian Schultz-Lorentzen oqarpoq.

Qanorluunniit pisoqarsinnaarpasippoq. Naalakkersuisooqatigiilli ukiakkut ataatsimiinnermi ilungersunartorsiortinneqassanngippata nalunaaruteqartoqarnissaanut piffissaaruttoqalerpoq.

Powered by Labrador CMS