Oqaaseqartartoq: Kalaallit Nunaata Danmark qimallugu USA toqqassappagu ajorluinnassaaq
USA-mut atalinnginnissaq kalaallit politikkeriisa erseqqissaatigisariaqarpaat, Venstrep Kalaallit Nunaat pillugu oqaaseqartartoq Marcus Knuth isumaqarpoq
USA-mik niuernikkut suleqatigiilluartoqarsinnaavoq, taamaattoq USA isumalluutigineqalissanngilaq. Venstrep Kalaallit Nunaat pillugu oqaaseqartartua Marcus Knuth isumaqarpoq.
- USA-p Kalaallit Nunaannik niuernikkut aamma allatigut suleqateqalernerunera tikilluaqqusariaqarpoq. Taamaattoq Naalakkersuisut oqariartuutaat oqaatigineqaqqittariaqarpoq: Greenland is open for business not for sale, Sermitsiaq.AG-mut oqarpoq.
Namminiilivinnissaq anguniarlugu USA qanoq suleqatigineqarsinnaassanersoq Pele Brobergimit (PN) oqariartuutigineqareerpoq. Marcus Knuth (V) tassunga isumaqataanngilluinnarpoq.
- Free-association aqqutigalugu Kalaallit Nunaat USA-mik suleqateqarnerulernissaa, taamaasilluni Naalagaaffeqatigiinnermit aninissaa, Kalaallit Nunaannit anguniarneqassanngilaq. Taamaattoqassappat kalaallinut ajorluinnartumik kinguneqassaaq.
- Alaskami innuttaasut maanna qanoq atugaqartinneqarnersut takuneqarsinnaavoq. Atugarissaarnerup tungaatigut Danmarkimi Naalagaaffeqatigiinnermilu pitsaanerpaamik inissisimavugut. Naalagaaffeqatigiinneq qimallugu USA-mik suleqateqartoqalissappat innuttaasut ajornerusumik inissisimalissapput.
- Aamma ilaqutariippassuit kultureqaqatigiinnerpullu eqqarsaatigisariaqarput. Kalaalerpassuit Danmarkimi najugaqarput, assinganik aamma danskerpassuit Kalaallit Nunaanni najugaqarlutik. Taakku imaaliallaannaq USA-mit allanngortinneqarsinnaanngillat.
Pele Brobergip isumaliutai Naalakkersuisunit anguniarneqanngillat. Tamanna USA-mut oqariartuutigineqartariaqartoq Marcus Knuth isumaqarpoq.
- USA-mik niuernikkut suleqatigiinnerulernissamut atatillugu USA ilisimatinneqartariaqarpoq Kalaallit Nunaat USA-p ataaniilerumanngitsoq.