Skip to main content

Oqaaseqartartoq: Aningaasat kalaallit meerartaannut iluaqutaanngippata ingasappallaarpoq

Folketingimit 80 millioner koruunit meeqqanut atugarliortunut aningaasaliissutigineqarsimapput, aningaasalli meeqqanut toqqaananrtumik iluaqutaasimarpasinngillat.

Kalaallit Nunaanni meeqqanik innarliisarnerpassuit pillugit nalunaaruteqartoqartarmat, Folketingi 2019-imi 80 millioner koruuninik Namminersorlutik Oqartussanut immikkut aningaasaliissuteqarpoq.

Aningaasat meeqqanut taakkulu ilaqutaannut atugarliornerpaanut ikiorsiissutissatut siunniunneqarsimapput, Martha Lund Olsenili Kommuneqarfik Sermersuumi Meeqqanut Ilaqutariinnullu ingerlatsivimmi pisortaq naapertorlugu, immikkut aningaasaliissutigineqarsimasut meeqqanut iluaqutaasimanngillat.

- Ikiorsiissutissatut tunniunneqarsimasut amerlanersaat Isumaginninnermut Aqutsisoqarfiup 60-80-inik sulisoqartup annertusarneqarnissaanut kiisalu Danmarkimi kommuninut isumaginninnermi siunnersortit sisamat kommunip suliassaanik ikiuukkiartortitsisimanerannut akiliutitut atorneqarsimapput,  taanna tusagassiorfimmut Sermitsiaq.AG-mut oqarsimavoq.

Ajorluinnarpoq

Tamanna Dansk Folkepartiimi Kalaallit Nunaannut tunngatillugu oqaaseqartartup Søren Espersenip kamaatigaa.

- Isumaqarpunga aningaasat allanut atorneqarsimanerat ingasappallartoq. Tamanna ajorluinnarpoq.

- Ilikkagaqarpugut. Kalaallit Nunaat aningaasaliissutinik eqqortumik atuisanngippat, inatsisitigut pisussaaffipput malillugu tapiissutit ataatsimoortut tunniuttakkatta saniatigut tapiissuteqaqqissanngilagut, taanna oqarpoq.

DR-ip piviusulersaarutaa "Byen hvor børn forsvinder" takutinneqarmat, Tunup illoqarfiani Tasiilami meeqqat kinguaassiuutitigut innarlerneqarsimasut kommunimut saaffiginnikkaagamik amigartumik ikiorserneqartarnerat imaluunniit ikiorserneqartannginnerat ukkatarineqalerpoq.

Tamatuma malitsigisaanik Folketingi ataatsimoortumik tapiissutit tunniunneqartartut saniatigut immikkut 80 millioner koruuninik aningaasaliissuteqarpoq, meeqqat taakkulu ilaqutaat atugarliornerpaat ukiut sisamat ingerlaneranni ikiorserneqarnerusarnissaat anguniarlugu.

Akisussaaffik isumaqatigiinngissutaasoq

Søren Espersenip oqaatigaa, ukiut qulit ingerlaneranni aatsaat Kalaallit Nunaannut immikkut aningaasaliissuteqartoqarsimasoq, oqaatigaalu Kalaallit Nunaata "soorunami Danmarkip aningaasat sumut atorneqarnissaannik eqqarsaateqarsimanera ilisimajuarsimagaa".

Kalaallilli Nunaanni Namminersorlutik Oqartussat suliamut atatillugu kisimik akisussaaffeqarnerannik oqarneq eqqortuunngilaq.

Taamatut isumaqarpoq Aaja Chemnitz Larsen, Kalaallit Nunaanni partii Inuit Ataqatigiit (IA) sinnerlugu Folketingimi ilaasortaallunilu Kalaallit Nunaannut Ataatsimiititaliami siulittaasuusoq.

Aamma atuaruk: Aningaasat imatut atorneqarsimapput

Aaja Chemnitz Larsenip erseqqissaassutigaa, Kalaallit Nunaat nammineerluni suliniummut 20 millioner koruuninik aningaasaliissuteqarsimasoq, aamma Danmarkip Kalaallillu Nunaata tamanna ataatsimoorlutik suliarisimagaat, ataatsimoorlutillu meeqqat suliniuteqarfigineqartarnerat nukittorsarniarlugut 16-inik inassuteqaasiorsimasut.

- Aningaasat sumut atorneqassanersut pillugut Folketingimi ilaasortaasugut Danmarkimi naalakkersuisunit Kalaallillu Nunaata Naalakkersuisuinit ilisimatinneqarsimanngilagut.

- Isornartorsiuisimaqaanga, kissaatigisimavaralu aningaasat pinaveersaartitsinermut siusissukkullu iliuuseqarnissamut atorneqassasut, taamaammat Kalaallit Nunaannit isornartorsiuinerit ilaat isumaqatigaakka, oqaatigisariaqarparali Kalaallit Nunaanni Namminersorlutik Oqartussat kisimik tamanna akisussaaffiginngimmassuk, tamannami eqqortuunngilluinnarmat, taanna oqarpoq.

Ministerimut apeqquteqarsimasoq

Aaja Chemnitz Larsen isumaqarpoq, aningaasat meeqqanut atorneqarsimasut, tamannali toqqaannanngitsumik pisimasoq.

- Soorunami sullissisut pikkorissut pisariaqartinneqarput, inatsimmilu amigaataasut tamarmik suliniutigineqartut ilaannut atatillugit iluarsineqartariaqarsimallutik, taamaammat Kalaallit Nunaanni nammineq inatsisivut malinneqarsimapput, taanna oqarpoq.

Aningaasaliissutigineqarsimasut aningaasallu sumut atorneqassanersut pillugit isumaginninnermi ministerimut Astrid Kragemut 20-t missaannik apeqquteqaateqarsimavoq. Ministeri aamma aningaasat sumut atorneqartarnissaat pillugit Kalaallit Nunaannut Ataatsimiititaliamut oqaluttuariartoqqullugu qaaqquneqarsimavoq.

Ritzauip isumaginninnermi ministeri Astrik Krag (S) aamma Meeqqanut, Inuusuttunut Ilaqutariinnullu Naalakkersuisoq Paneeraq Olsen apersorniarlugit pissarsiarinarsarai.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER