Oqaaseqartartoq: Uldumip taamaatinnerata Demokraatit nukillaartippaat

Juulimi 2008-mi partiip pilersitsissua Per Berthelsen, sivisuumik partiimi avissaartuuttoqareersorlu siulittaasutut tunuarpoq.

Septembarimi 2013-imi Palle Christiansen Inatsisartuni aamma Demokraatini ilaasortatut malunnaatilittut tunuarpoq, Danmarkimut nuunnini pissutigalugu.

Januaarimi 2014-imi siulittaasoq Jens B. Frederiksen tunuarpoq. Taanna aatsitassarsiornermik ingerlatsivimmi True North Gemsimi pisortatut assorluni ingerlalerami taamaatippoq.

Stressi
Aamma januaarimi ukioq manna paarlattaa Anda Uldum taamaatippoq.

Novembarip aappaani 2015-imi Anda Uldum, Demokraatini siulittaasuusoq aningaasaqarnermut aatsitassanullu naalakkersuisuusoq kiisalu Naalakkersuisut siulittaasuanut tullersortaasoq stressernini pissutigalugu sulinngiffeqarluni nalunaarpoq. Januaarillu aqqaneq-aappaani politikkimit tunuarluni politikeri nalunaarpoq.

Taarseraanneq
Tamatumalu partiip siulittaasuisa taarseraattaqattaarnerisa partii nukillaarsaraat, politikkikkut oqaaseqartartoq Sten Lund KNR-imut naliliivoq.

- Marlunnik isumaqarsinnaavoq, sanngiillissutaasinnaavoq imaasinnaavorluunniit nikittoqanngitsoq. Kisianni taamannak siulittaasumik tunuartoqartarnera Demokraatiniik siulliunnginnami taannartaa eqqarsarnartoqalaarpoq, Sten Lund nassuiaavoq, taassuma ilaatigut Per Berthelsen, Jens B. Frederiksen siulittaasuusimasut aammalu Inatsisartunut ilaasortaasimasoq Palle Christiansen tikkuarpai.

Katersuutsitsisoq
Taassuma aamma Anda Uldum partiimi katersuutsitsisutut nalilerpaa - aammalu saniatigut politikkikkut suliniutit qineqqusaarnerup nalaani parteeqatiminut malunnaatilinnut agguaassinnaaneri piginnaasaqarfigalugu. Tamatumalu Demokraatit nukittuunik qinigassanngortitaqartutut isikkoqalersippaa - nukittuuginnarmik siulittaasoqaratik.

Aamma atuakkit:

Randi: Andap aalajangernera paasinarpoq

Andap atorfeqarnera assiliartalersorlugu