Topchef-exit

Oqaaseqaat: Siumutoqannguaq

Naalakkersuisut namminersorlutillu oqartussat tatigineerukkaluttuinnartut nunap pisortaa nipangersimalluinnarpoq

Naalakkersuisut siulittaasuat Aleqa Hammond, Siumut

Oqaaseqaat allanneqarpoq Søren Duran Duus-imit, Sermitsiaq.AG-p aaqqissuisuanit:
Peqquserluuteqarsimasutut unnerluutigineqartumik maannalu naalakkersuisoqarfimmi pisortatut tunuartumik Carsten Frank Hansenimik pisimasukkut nutaakkut Naalakkersuisuni namminersorlutillu oqartussani mamianartuliat imaaginnalivipput.
Ajoraluartumik nutaartaqanngilaq. Mamianartuliat naaffeqanngiusarunarput.
Tamanna pivoq nunami qaffasinnerpaamik atorfilik, Siulittaasup Naalakkersuisoqarfiani pisortaq Svend Hardenberg pikilluni pissutissarsiuleruttortoq qallunaallu siunnersuinermik ingerlatsiviat, Carsten Frank Hansenimik sulisussarsisitsisimasoq, pisuutinniarsaralugu.
Tamanna eqqumiippoq, tassami Svend Hardenbergip nammineq nassuerutigisimavaa Carsten Frank Hansenimik atorfinitsitsinermut naggataatigut nammineq akisussaasuulluni Naliliinermut Ataatsimiititaliami siulittaasuunini pissutigalugu. Ilanngullugulu nassuiaasimavoq Ramsdal imaluunniit nammineq Carsten Frank Hansenip Greentop Greenland-imit pisortatut soraarneranit paasissutissanik pissarsiniarsimanatik. Greentop Greenlandimi siulersuisuni siulittaasoq Ole Rud kingorna nassuiaasimavoq taanna atorfimminit peersitaasimasoq soraarsitaallunilu.
– Kikkut tamarmik assatik salinniarunarpaat atorfinitsitsinermut (Carsten Frank Hansenimik Aningaasaqarnermut Nunallu iluani Pissutsinut Naalakkersuisoqarfimmi pisortatut, aaqqiss.) tassunga atatillugu suliassartik naammattumik suliarisimannginnamikku, Ole Rud ilaatigut Sermitsiaq.AG-mit apersorneqarluni oqarnikuuvoq.
Aleqa Hammondimit ikiorneqanngilaq
Naalakkersuisut siulittaasuata naalakkersuisoqarfiani pisortaq Svend Hardenberg uterfigigutsigu, taassuma Carsten Frank Hansenimik mamianartuliap tusagassiorfitsigut qulaajarneqarnerani akisilluni KNR naqqiissuteqaqquvaa. Naqqiissuteqaqqusineq Radioaviisip eqqorluinnartumik itigartippaa, tassa Hardenberg kukkusimammat knr.gl-imullu aamma Radioavisimut akerleriilluinnartunik oqaaseqarluni - Greentop Greenlandimut atatillugu Carsten Frank Hansenimut paasissutissanik piniartoqarsimava imaluunniit piniartoqarsimanngila.
Tassalu taamaasiortoqarsimanngilaq.
Tamanna soorunami Ramsdalimut sungiussisimasumullu 44-nik ukiulimmut Svend Hardenbergimut isornartuuvoq, Hardenbergilu juulip aallaqqaataani nunami atorfiit qaffasinnerpaannut ikkukkamili tatigineqartorujussuusimavoq.
Ajornerusorli alianarlunilu quianaannartoq tassaavoq Aleqa Hammond nipangersimajuarmat. Svend Hardenberg nammineeqqili, tamanna periusererpasippaa, Berlingske-p oqaluttuarigaluaraa Aleqa Hammondip piumasarisimagaa taanna Siulittaasup Naalakkersuisoqarfiani pisortatut atorfinitsineqassasoq, Naliliinermut Ataatsimiititaliap allat marluk piukkunnarnerit, tikkuarsimagaluarai.
Tassa ersarilluinnartumik politikkikkut atorfinitsitsineq.
Aleqa tatineqartoq suli nipangersimavoq
Siusinnerusukkut Naalakkersuisuni namminersorlutillu oqartussani mamianartuliani tamani pisarnertut Naalakkersuisut siulittaasuat tamatumuunattaaq aamma tusagassiorfinnit apersortikkusunngilaq.
Aamma - manna tikillugu - allaat tusagassiorfitsigut nalunaarutit tunuanni toqqorsimanianngilaq.
Aamma Aleqa Hammond - isornartorsiuinermut atatillugu tusagassiorfinnut atatillugu silatunerulersimanngilaq - ammanerulersimananilu - siunnersortigisimasaata Julie Rademacherip septembarip 15-ianni Sermitsiaq.AG-mi oqaluttuarnerata kingorna, atorfimminit tunuarluni ´pissutigalugu suliani allanngorsimammata Aleqa Hammondimullu pissutsini allanngorsimammat´.
Mamianartuliornerit ingerlaqqipput, nalunaratut isornartorsiuinerillu ullut tamaasa amerliartortut,s tamannalu peqatigalugu Naalakkersuisut namminersorlutillu oqartussat tatigineerukkaluttuinnartut.
Taamaassimavoq ukioq manna marsip 12-ianni Siumut ilaalu pissaanermik tigusimmatali.
Aleqatoqannguaq. Siumutoqannguarlu. Qaa sassarniaritsi!
Carsten Frank Hansenimik mamianartuliamik Sermitsiaq.AG-p allaaserisai tamaasa atuakkit

Powered by Labrador CMS