Operation Dagsværk: Inuusuttut isummat pigiliutiinnakkat nungusarniarpaat

Danmarkimi aamma Kalaallit Nunaanni ilinniarnertuunngorniarfimmi ilinniartut Kalaallit Røde Korsiannut aamma Ungdommens Røde Korsimut katersuiniussiniarput

Operation Dagsværk Operation Dagsværk Operation Dagsværk Operation Dagsværk Operation Dagsværk Operation Dagsværk

Ukiamut ilinniarnertuunngorniarpassuit Danmarkimiittut Nunatsinniittullu Kalaallit Røde Korsiat (KRK) Ungdommens Røde Korsillu (URK) Nunatsinni suliniutissaannut katersuiniassapput peqatigiiffik Operation Dagsværk katersuisoralugu.

Katersuiniarnissaq pitsaanerulersinniarlugu kajumissutsiminnik sulisut qulit URK-mi Operation dagsværkimilu sulisut massakkut nunatsinniipput.

Pilersaarutit ilai taasinnaavagut soorlu Nuummi Sisimiunilu inuusuttut naapinnissai, eqqumiitsuliortut, poltikkerit ilisimatuullu soorlu Kim Kieldsen, Josef Tarrak aamma Maya Sialuk naapinneqassapput. Tikeraarnerup siunertaraa inuusuttut nunatsinniittut ulluinnaasa paasisaqarfiginerunissaat. Kiisalu ukialerpat katersuiniarnissami inuusuttut Danmarkimiittut Kalaallit Nunaanniittullu katillugit 60.000-it missaaniittut peqataaffigisassaanni paasissutissat massakkut katersorneqartut paasititsiniutigineqassapput.

Kalaallit inuusuttut peqataasut

Isummat pigiliutiinnakkat nutaanik taarserneqassapput
Kampagne inuusuttunit 500 missaaniittunit peqataaffigineqarpoq. Ukialerpat nunatsinni inuusuttuuneq moderniusoq Danmarkimi takutinneqartassaaq inuusuttut ullutsinni qanoq inooriaaseqarnersut takutinneqartassalluni. Siunertaavoq inuusuttut nunatsinneersut Danmarkimukaraangamik danskit kalaallinut isummat pigiliutiinnarnikuusaasa killilernissaat.

- Takutikkusupparput Kalaallit inuusuttortaasa Kalaallit Nunaat nunarsuullu sinnera allanngueqataaffigisinnaagaat. Kalaallit danskillu inuusuttortai suleqatigiilluta kalaallinut isummat pigiliutiinnakkat danksit suli pigisaat iliuuseqarfigerusuppagut, Troels Boldt Rømer Ungdommens Røde Korsimi nuna tamakkerlugu siulittaasoq angalanermilu peqataasoq taama oqarpoq.

Novemberip 7-ani Dagsværksdagemi ilinniarnertuunngorniat Danmarkimiittut Nunatsinniittullu ulloq ataaseq suliffeqarfinni assigiinngitsuni sulissapput sulinerminilu ullormi tassani isertinneqartut Kalaallit Røde Korsiata inuusuttunut immikkoortortaqarfianut KRK INUA-mut tunniunneqasssapput.

2019-miit 2021-mut KRK aamma URK nunatsinni inuusuttut illoqarfimminni ajornartorsiutitut isigisamik nammineerlutik qanoq suliniuteqarfigisinnaaneraat pikkorissaassutigineqartassaaq. Suleriuseq illoqarfinni tallimani ilinniaqqiffinnilu misilerarneqarnikuuvoq.

- Kalaallinik siuaasaqarpunga suliniummilu uani peqataasariaqavittutut misigisimallunga - upperigakku ataatsimoorluta Kalaallit Nunaanni Danmarkimilu allanngueqataasinnaalluta, Naja Kriegbaum Ottens Operation Dagsværkip allattoqarfiani kajumissutsiminik sulisoq taama oqarpoq. Taanna massakkut nunatsinni angalanermi peqataavoq inuusuttullu oqaluttuaannik katersilluni. Ukialerpat katersai Danmarkimi ilinniarnertuunngorniarfinni assigiinngitsorpassuarni paasititsiniutitut atorneqassapput nunatsinnilu inuusuttut qanoq isumalluarnartigineri ilinniarnertuunngorniarfinni eqqartorneqassallutik.

Powered by Labrador CMS