juullimi tusarnaartitsinerit
Operamik erinarsortartoq sinerissami tusarnaartitseqattaartoq
Kalaalleq operamik erinarsortartoq Josef Josefsen angalanerminut atatillugu illoqarfiit arlallit tikippai. Nuummi sapaatiuppat juullerpaluttunik tusarnaartitsissaaq
Nuummi innuttaasut sapaatiuppat operamik erinarsortartoq Josef Josefsen tusarnaariarsinnaavaat, taanna Hans Egedep Oqaluffiani juullerpaluttunik tusarnaartitsissaaq.
Tusarnaartitsineq nalunaaqutaq 19.30 aallartissaaq, tassani Josef Josefsen juullip tussiutaannik Nordisk Koncertkor ingiortigalugit erinarsussaaq.
Angalaneq misigisaqarfiusoq
Kalaaleq operamik erinarsortartoq novembarip 24-annili angalalerpoq, Ilulissat, Qasigiannguit, Sisimiut, Nanortalik, Qaqortoq, Narsaq aamma Paamiut tikippai, sapaatiuppallu Nuummi tusarnaartitsissaaq.
- Angalaneq misigisaqarfiulluarpoq. Kalaallisut, islandermiusut, qallunaatut aamma tuluttut erinarsoqattaarpunga. Angalaninni kikkut tamarmik tikilluaqqulluarpaannga, operamik erinarsortartoq Sermitsiaq.AG-mut oqarpoq.
Danmarkimut aallarniartoq
Angalaneq tamaanga killeqanngilaq, Josef Josefsen ataasinngorpat pattagiartartoq Jim Milne peqatigalugu Danmarkimut aallassaaq.
Tassanilu Aalborgimi, Aarhusimi, Københavnimi, aamma Kalaallit Illuutaanni nakorsiartullu uninngasarfianni kiisalu Helsingørimi tusarnaartitsissapput.
- Angalanitsinnut aningaasaliisunut tamanut qujarusuppunga, Josef Josefsen oqarpoq.