se billeder
Ooqattaasartartoq marloriarluni kuultinnareerluni: Anaanaga sungiusaasoraara
Ukaleq Slettemark pingasunngornermi ullaap tungaani AWG-mi ooqattaasarnermi aappassaanik kuultimik ujaminnappoq. Arpannerup kingorna Sermitsiaq.AG-p oqaloqatigaa
AWG-mi ooqattaasarlutik unammisussat pingasunngornermi arpaffissagissaarput.
Qinngutsinni ujakkaartarfimmi anorikippoq, arpaffissarlu piareersarluarneqarsimavoq, 14-inik ukiulik Ukaleq Slettemark oqaluttuarpoq, taanna AWG-mi ooqattaasarluni kilometerinik sisamanik isorartussusilimmut ataasiakkaarluni arpannermi aappassaanik kuultinnappoq.
Sungiusarluartoq
- Ataasiakkaarluni aallartinneq pissutigalugu, nammineq pitsaanerpaamik anguniaannagassaavoq, løjpemiittut aamma amerlammata, Ukaleq Slettemark oqarpoq.
Ajugaasup tullianit minutsit pingasut missaanik sukkaneruvutit. Arpattartunit allanit pikkorinnerungaatsiarunarputit. Soormita?
- Aap. Ujakkaarlunga sungiusarluartarpunga, maanna ukiut pingasut sungiusarluarnikuuara. Sungiusaasoralu qujassutissaqarfigaara, aallaasima nakersarneranut ikiuukkami, unamminerup aallartinnginnerani nakersaratta anoreqarnerunera pissutigalugu.
Anaana sungiusaasuusoq
Piffissami uuma allaaserisap saqqummersinneqarnerata nalaani, Ukaleq Slettemarkip ullormut angusaminut kuultimik ujaminnattaani tiguaa, taanna marlunngornermi kilometerinut tallimanut ataasiakkaarluni arpannermi aamma kuultinnakkami.
Slettemarkip sungiusaasuni sanileraa, taanna nunanut allanut unammisartunut sungiusaasuutigaluni aamma Ukaliup anaanagaa, Uiloq Slettemark.
Inuttalersuisartut
Ujakkaartartoq 14-inik ukiulik aperaarput, timersortartuulluni anaanani sungiusaasoralugu qanoq innersoq.
- Inuttalersuiniarsarisarpugut, angerlarsimagaangatta anaanaasarpoq, ooqattaasariaraangattalu sungiusaasuusarpoq.
Qanoq ittarpisi?
- Sungiusaasuugaangami sungiusaasup oqaatigisartagai iliuusissakka oqaatigisarpai. Sungiusanngikkaangatta uanga oqaasissaqarnerusarpunga, Ukaleq Slettemark Sermitsiaq.AG-mut oqarpoq.
AWG-mi arpannissat arlallit
Sisamanngornermi aamma tallimanngornermi ooqattaasartartoq arpannermi peqataassaaq, amerlasuujulluni aallartinnertalimmik, tallimanngorpallu stafettissaaq, tassanilu Ukaleq Slettemark kalaallit peqataasutuartarigamikkut allanik akuleruttunik arpaqateqassaaq.
AWG-mit oqaluttuat kingulliit:
DMI: Sila Arctic Winter Gamesimut tulluartoq
Arctic Winter Gamesimi pingasunngornermi pisussat