Ooqattaasarluni VM-erneq: Ukaleq Slettemark pitsaanerit 15-it akornanniittoq
Qatanngutigiit Slettemark ooqattaasarluni ujakkaarluni Youth VM-imi aamma Junior VM-imi Kasakhstanimi peqataanertik aallartippaat. Ukaleq Slettemark nr. 13-itut inissippoq.
Ukaleq, Sondre aamma Inuk Slettemark tamarmiullutik ooqattaasarluni ujakkaarnermi Youth aamma Junior VM-imi ulluni 1.-12. marts peqataanertik aallartippaat.
Ukaleq Slettemark ullormi unammissutaasumi ataasiakkaarnermi 12,5 kilometerimut arpannermi ataasinngornermi 6. marts unammeqataaqqippoq, unammisullu 85-it akornanni nr. 13-itut inissippoq. Arpanneq katillugit 20-nik ooqattaasarnertaqarpoq, ooqattaasarfinnut sisamanut agguakkanut.
Ooqattaasarnerit anorip unammillernartikkai
Sakkortuumik anorlernera pissutigalugu ullormi unamminissat kinguartinneqaleraluarput, kisianni pilersaarutit malillugit arpanneq ingerlanneqarpoq. Anorip sakkortussusaa sammivialu unammillernartoqartoq, Nunatsinni ooqattaasartartut kattuffiat tusagassiuutinut nalunaarummi ilisimatitsivoq.
- Ukaleq Slettemarkip nalinginnaasumik ooqattaasallaqqinnerpaat ilaanniittup, aamma World Cupimi, anorip akornusersuinera namminerminut iluaqutaasutut isigaa. Aallartilluarlunilu pallorluni iginnermini siullermi uniunngilaq, nikuillunilu iginnermini siullermi ataaseriaannarluni uniorpoq, kattuffik ilisimatitsivoq.
Taamaalillunilu kaajallannerni siullerni marlunni tallimaattut inissippoq.
Ukaleq Slettemarkip igeriarnernit 20-nit 15-it eqqorpai. Unamminermilu immikkoortoq kingulleq unammillernarnerarpaa:
- Ingammik nikuilluni ooqattaasarneq kingulleq uuminarpoq. Anorleqaaq, igeriarnernilu marlunni siullerni sukkavallaamik igippunga, taakku marluk uniorpakka. Normu 13-itut apuunnera ajunngilaq, kisianni nikuilluni iginnermi kingullermi uniunngitsuuguma ajugaasut ilaanniinnissara ilimanaraluarpoq, Ukaleq Slettemark oqarpoq.
Nukappissat perserneranit unammillernartoqartitsisut
Sondre Slettemark aamma Inuk Slettemark ooqattaasarluni Youth VM-imut siullermeerlutik sapaatiummat 5. marts peqataapput. Taassuma unammineq nittaalartorujussuusoq naammassivaa, tamannalu ooqattaasarnermi eqqoriagassat eqqornissaannut aamma apummi nutaarluinnarmi ujakkaarnissamut unammillernartoqarpoq, kattuffik ilisimatitsivoq.
Sondre Slettemark 20-nik igeriarnerminit arfinillit uniorpai, peqataasunilu 96-ini nr. 33-tut inissilluni:
- Inissinnera pakatsissutigisorujussuuara. Qaffasinnerpaaq anguniagarigaluarpara. Kingulliulluni aallarneq qanoq annertutigisumik ajoqutaasussaanersoq nalornissutigaara, kisianni kaajallannerit marluk kingulliit apummi nutaami anorlersumilu arpannerit oqimaapput. Unammilluarsinnaallunga misigisimagaluarpunga, unalu unammineq sukkanerpaamik puiguinnarlugu tallimanngorpat naatsumut unamminissaq eqqarsaatigissavara, Sondre Slettemark inissinnini pillugu taama oqarpoq.
Misilittakkanik aallertoq
Inuk Slettemark aamma Youth VM-imut peqataavoq. Taanna siullermeerluni peqataavoq, taassumalu unamminermi nunarsuarmi pitsaanerpaat akornanni misilittagaqalernissani ukkataraa. Taanna 72-itut aallarpoq, 62-iullunilu apuuppoq. Ooqattaasarnernit 20-nit 14-it eqqorpai.
- Naammagisimaarpara. Aallartittuni taama kingulliutiginera aamma uannut iluaqutaanngilluinnarpoq, taamaattumik tallimanngornermi pitsaanerit 60-t akornanni inissinnissara anguniarpara, taamaalillunga jagtstartimut anngutissagama, Inuk Slettemark oqarpoq.
VM-imi tallimanngornermi Sondre Slettemark aamma Inuk Slettemark sprintimi unammissapput.