Ono Bourup Sisimiuneersoq meeqqat pingasunngornermi qimussimik sukkaniummata, Avannaata Qimussersuaaraa 2023-mi ajugaavoq. Qimussimik sukkaniunnermi 8 kilometerit sinnilaarlugit ingerlaavigineqarput.

Sukkaniunnermi Saqqameersoq Ina Ruth Eriksen Nielsen siuttuusimagaluartoq, ajugaasup piffissaq kingulleq qaangerpaa.

Qimussimik sukkaniunneq pissanganartoqanngitsuunngilaq. Ira Ruth Eriksen Nielsen sukkaniunnermi siuttuugaluarluni apuuffissaq tikitsinnagu sangoriarnermi qamutiminit katataavoq, qamutillu kinguninngua tinngallarujussuarlutik.

- Pisoq isigalugu sakkortunerusut isikkoqarpoq. Qamutini ingerlaartoq katataagaluarluni ajoqusinngilaq. Soorunami taama pisoqarnera uggornarpoq, katataannginnerminimi qimussimik siuttuugaluarpoq, Qimusseq Sisimiuni siulittaasoq, Susanne Berthelsen oqaluttuarpoq.

Tikittut inissinneri:

1. Ono Bourup, Sisimiut
2. Gaaba Petersen Geisler, Sisimiut
3. Kali Tobiassen, Ilulissat
4. Minik Ingemann, Sisimiut
5. Jan Jensen, Saqqaq
6. Carl Christiansen, Sisimiut

Qimussit pingasut, Ina Ruth Eriksen Nielsen Saqqamiit, Nicu Johansen Kajusen Sisimiuniit aamma Gaaba Petersen Ilulissaniit apuutinngitsoorput. Marluk qimmeersernerminni ingerlaqqissinnaasimanngillat, ataaserlu qamutinit nakkarami ingerlaqqissinnaasimanani.

Aaqqissuussaq ajunngivissoq

Qimusseq Sisimiut qimussimik sukkaniutsitsineq pingasunngornermi unnukkut naliliiffigissallugu ataatsimiissutigaat. Naak qimmeersertoqaraluartoq ajutoortoqaraluartorlu aaqqissuussaq ataatsimut isigalugu ajunngitsumik nalilerneqarpoq.

- Aaqqissuussaq ajunngitsutut nalilerparput. Isiginnaariat qiimmassaalluarnerat assut nuannerpoq. Meeqqat aamma nuannisartut maluginiarparput, tamannalu misigisaqarfigilluaraat aamma takusinnaavarput, Susanne Berthelsen oqarpoq.

Sisimiuni Avannaata Qimussersuaaraata naammassineqareernerani ajugaasup qamutai biilinik illoqarfimmi kaajallaanneqarput, biilit arlallit illoqarfimmi kaajallaaqataallutik.

Avannaata Qimussersuata ingerlanneqarnissaa tullernguuppoq, tamanna arfininngorpat pissaaq.