OneWeb Nunatsinni imarsiortunut sukkasumik interneteqartitsiniarpoq
Tuluit qaammataasaatileqatigiiffiat OneWeb kalaallit kilisaataannut sukkasuumik interneteqartitsiniarpoq. Siullermik atortut Polar Seafoodip umiarsuaanni misilerarneqassapput.
Tuluit OneWeb aamma Amerikamiut Starlink qaammataasatigut attavilimmik internetimik sukkasoorujussuarmik nunarsuarmi avinngarusimasuniittunut interneteqartitsiniarpoq. Kilisaaterujussuarnit uuliasiorfinnut, umiarsuarnut takornariartaatinut aamma inoqarfinnut avinngarusimasuniittunut ilaatigut Kalaallit Nunaanni, Canadami aamma Alaskami.
Aviisi Sermitsiaq taama allappoq.
Suliffeqarfissuaq Polar Seafood OneWebip imaaniittunut niuerfimmi tuniniaalluni saqqummersitsineranut atatillugu siulliuniarpoq. Ukiup nutaap aallartinnerani danskit suliffeqarfiata Vodanetip Assensimiittup OneWebip atortui Polar Seafoodip kilisaataannut avataasiortunut ikkullugillu misilinneqassapput.
- Suna tamarmi nutaajuvoq. Siulliulluta OneWebip atortui kalaallit kilisaataanni Kalaallit Nunaata eqqaani aalisarneranni misilittussanngorpavut. 2023-mi kvartalimi siullermi antennat kilisaammut raajarniummut Polar Nattoralimmut amutsivimmi Ørskovimi Frederikshavnimi, umiarsuup avannaanut aallannginnerani ikkutissavavut, Vodanetimit pisortaaneq Thomas Schultz Sermitsiamut oqarpoq.
Vodanet kalaallinut atuisunut internetimik, tv-mik allanillu imaani aaqqiissutinik atuititsinermut immikkut ilisimasaqarpoq, suliffeqarfinnut namminersortunut aamma Namminersorlutik Oqartussanit pigineqartunut.
Aviisimi Sermitsiami atuarnerusinnaavutit. Aviisi uani pissarsiariuk:
