Ombudsmandip isornartorsiuinini ima tunngavilersorpaa
Akuerineqarsinnaanngitsoq isorisarialerujussuarlu. Oqaatsit marluk, naammagittaalliuutip ajornerujussuanik takutitsisut, tassa anaanaasumut meeqqami innarluuteqartup ikiorneqarnissaanut ukiuni pingasuni utaqqisariaqarsimaneranut tunngasoq. Suliaq Inatsisartut Inatsisinut Ataatsimiititaliaannut ingerlateqqinneqarpoq, taamaattoqartarnera akuttusoorujussuuvoq.
Isornartorsiuineq Vera Lethimit pingasunngormat saqqummiunneqarpoq, kommunilu pineqartoq, suliani piffissamik sivisuumik suliaqannginnissaq siunissami pinngitsoortinniarlugu, akissuteqartussanngorlugu pisussanngortinneqarluni.
Kommunimmi sulisunik amigaateqarneranik nassuiaateqarnera, ombudsmandip naammaginngilaa.
Ombudsmandip suliaq Inatsisartut Inatsisinut Ataatsimiititaliamut ingerlateqqippaa, isumaqarami suliaq ajorluinnartoq pisariaqarpallu politikerit qisuariarnissamik periarfissaqartariaqartut. Ukiuni tallimani kingullerni pingasoriaannarluni taama isiortoqarsimavoq.
Kanngunartoq
Suliaq kommunimi avannaaniittumi isumaginninnermut akisussaasuusunut kanngunarsimassaaq. Suliaq kommunip avinneqanngikkallarneranili aallartinneqarpoq, ombudsmandillu ilisimatitsissutiginngilaa kommune sorleq ima oqaaseqarfiginerlugu: Akuerineqarsinnaanngitsoq isorisarialerujussuarlu.
Vera Lethip suliap ajorluinnarneranut ersarissaaniarluni oqaatsit arfinillit atorpai.
Suliaq ajornernut ilaavoq, isorinninnerli sakkortunerusimasinnaagaluarluni.
Immikkoortut arfinillit
Ombudsmandip oqaatsinik atuinermini immikkoortunut arfinilinnut agguaanera aajuna:
- Iluatsinngitsoq
- Ajuusaarnartorujussuaq
- Isornartoq
- Akuerineqarsinnaanngitsoq
- Akuersaarneqarsinnaanngitsoq
- Akuerisassaanngitsoq
Ombudsmandeqarfimmi inatsisilerinermi pisortaq, Kim Blokbo, Sermitsiaq.AG-mut ilisimatitsivoq immikkoortut marluk sakkortunerpaamik isornartorsiuinermi atorneqartartut ilanngunneqarsimasut.
- Oqaaseq ”akuerineqarsinnaanngitsoq” nalinginnaasuuvoq, naak oqaatsini sakkortunerusuni ilaagaluartoq, Kim Blokbo nassuiaavoq.
Naalakkersuisoqarfik ilanngunneqarsinnaavoq
Ombudsmandip naliliinera kommunimit akineqarpat, tamanna tusaatissatut tiguneqaannarsinnaavoq, susoqaqqissananilu.
Kommunilli suliniutai naammaginngikkunigit, taamallu pisoqaqqinnginnissaa qulakkeerniarlugu, suliaq ingerlateqqillugu naalakkersuisoqarfiup kommunimut nakkutilliilernissaa suliarisinnaavaa.