Ombudsmandip isornartorsiuinera (immaqa) kingulleq
Ombudsmandip soraarninngungajalersup oqartussanut tunngatillugu, pingaartumik kommuninut inatsisinik unioqqutitsisartunut isornartorsiuinermini tunuarsimaartanngilaq.
- Ombudsmandiuneq ataqqinaataasimavoq.
Vera Leth, ukiuni 26-ni ombudsmanditut atorfeqareerluni soraarninngulersoq taama oqarpoq.
Taanna ukiumooortumik nalunaarusiaani sisamanngornermi tunniunneqartumi atuarneqarsinnaavoq.
Vera Lethip tassani ukiut qaangiuttut qiviarpai, kisianni aamma 1997-imi atorfininnerminut kingumut qiviarpoq.
Ineriartorneq alianartoq
Taamanerniilli pisut amerlapput. Kisianni Vera Lethip oqarnera naapertorlugu piffissap ingerlanerani unammilligassat annerpaartaasa ilaat qaangerneqarsimanngilaq: oqartussaasut, pingaartumillu kommunit, ingerlatsinermik inatsiseqartitsinermi pingaarnerusutigut malittarisassanik malinnitsinniarneqarnerat.
Tamanna soorlu suliassat suliarineqartarnerat pillugu inatsit allakkatigoortitsinissamik, tunngavilersuisarnissamik, inatsisinut tunngavigineqartunut innersuussisarnissamik naammagittaalliornissamullu periarfissamik ilitsersuisarnissamik piumasaqaateqarfiunermigut oqartussaasut suliani pineqartuni aalajangiinerini pingaarnerusutigut aalajangersaasuusoq eqqarsaatigalugu atuuppoq.
- Naammagittaalliuutit innuttaasunit 1997-imi tigusama ilarpassui oqartussaasut pingaarnerusutigut malittarisassanik taakkuninnga malinninnginnerannut tunngasuupput, ombudsmandi allappoq, nangillunilu:
- Tamanna 2022-mi ajoraluartumik suli atuutikulasorujussuuvoq.
Kukkunerit ilungersunartut
Ukiup siulianut ukiumoortumi nalunaarusiami kommunit ingerlatsivii suliassaqarfimminni tamarluinnangajanni ajornartorsiuteqartut, ombudsmandip oqaatigaa.
- Tamanna pissutigalugu suliniut 2021-mi aallartippara, tassanilu sulianik meeqqat angerlarsimaffimmik avataannut inissinneqartarnerinut meeqqallu inissinneqarsimasut angerlartinneqartarnerinut tunngasunik kommunit suliarinnittarnerat aallunneqarniarluni:
- Kommunit sulianik meeqqanut tunngasunik oqimaatsunik pingaaruteqartunillu suliarinninnerminni ajornartorsiuteqarnerannik paasisara suliniutip taassuma uppernarsarpaa.
Kommunit ilungersunartunik kukkussuteqartartut ilaatigullu paasissutissanik pissarsiniarnertik meeqqanillu angerlarsimaffiup avataanut inissiinermut imaluunniit meeqqanik inissinneqarsimasunik angerlartitsinermut atatillugu inatsisikkut piumasaqaataasutut misissuinernik ingerlatsiniartarnertik ajornartorsiutigisaraat, taanna ilisimatitsivoq.
Ilimaginninnerit eqqortut
Suliniutip aallartinneqannginnerani ombudsmandip kommunit sulianik suliarinninnerini ajornartorsiutit taakkuujuarnerusut qulaajarneqarnissaat ilimagaa.
- Taamaassangatitsineq taanna ajoraluartumik eqquuppoq, taanna oqarpoq.
Nangillunilu:
- Aamma oqaatigaara neriuutigigiga suliassaqarfimmi tassani killiffimmik saqqummiussinikkut qinikkatut aalajangiisartut eqqarsaatissinnissaannut suliniutinillu nutaanik aallartitsissagunik taakkununnga aallartitsinissaannut tunngavississinnaassallugit.
Nalunaarusiarli nipangersimalluni tiguneqarpoq.
Oqartussanut ilitsersuut
Ingerlatsineq pillugu inatsiseqartitsinermik suliassaqarfimmi ukiut ingerlaneranni annertunerusutigut pitsanngoriartitsisoqarsimanngitsoq, ombudsmandi inerniliivoq.
Tamanna naammanngilaq, Vera Leth isumaqarpoq, taamaattumillu oqartussanut ilitsersuummik suliaqarniarluni aalajangersimavoq.
Ilitsersuutikkut tassuuna inatsisini malittarisassat sulianut attuumassuteqartut, ukiut ingerlanerini ombudmandip oqaaseqaatigisartagai inatsisilerinermilu atuakkiaasartut atuisunut paasiuminartumik eqikkarniarpakka. Oqartussaasunut ilitsersuut taanna nittartakkanni tamanut saqqummiunneqassaaq.
Ombudmandi kingullermi Qeqqata Kommuniani suliamik suliarinninnermut piffissarlu atorneqartoq sakkortuumik isornartorsiorpaa.