Ombudsmandi: Meeqqat inissinneqarsimasut pillugit sulianik isumaginnissimaneq isornartortaqartupilussuuvoq

Inatsisartut ombudsmandiata Vera Lethip, angajoqqaat akuersissuteqarnerisigut, meeqqat inissinneqarsimasut pillugit suliat arfinillit ukiuni sisamani kingullerni misissorsimavai.

Sulianik arfinilinnik nalinginnaasumik misissuinerup takutippaa, sulianit arfiniliusunit tallimat sullinneqarneranni kukkusoqangaatsiartarsimasoq.

Kommuniusimasup, nalunaarusiami Kommuni K-mik taagorneqartup, angajoqqaat akuersissutaannik pissarsisimanera sulianilu arfiniliusuni tamani iliuusissatut pilersaarusortoqarsimanera ombudsmandip nuannaarutigaa.

Nersualaarinninnerli tamaanga killeqarpoq.

Meeraq ataaseq pillugu suliat ilaat Ombudsmandimut ernumalersitsivoq. Nalunaarusiamini allassimavaa, ”Suliamili allagaatit kommunip M6-imik anaanaasoq akuersitillugu

inissiiniarluni suliniuteqartarsimanera pillugu paasissutissanik arlalinnik imaqarput, ilaatigut piffissani sivikinnerusuni 25. oktober 2014-imit, 4. november 2014- imit, 30. januar 2015-imit aamma 21. april 2016-imit”.

Inissiinerni nutaani arlalinni nutaamik iliuusissatut pilersaarusiortoqarsimanngilaq.

- Isornartoqartippara, Qaasuitsup Kommuniata suliani ataasiakkaani iliuusissatut pilersaarutitaqanngitsumik arlaleriarluni meeqqamik ataatsimik piffissani sivikitsuni inissiisarsimanera.

Akuersissummik utertitsineq

Qaasuitsup Kommunia meeqqat inissinneqarsimasut pillugit suliani Ombudsmandimit aatsaat isornartorsiorneqalinngilaq. Ombudsmandip, kommuniusimasup inissiinissamut isummernissaminut ukiunik tallimanik atuisimanera aggustusip qaammataata naanerani isornartorsiungaatsiarpaa.

Suliat arfinillit pineqartut ilaat aamma taamatut isornartorsiungaatsiarpai.

Meeqqat ilaasa angajoqqaavi, meeqqap angerlarsimaffiup avataanut inissinneqareernerani, akuersissumminnik atorunnaarsitsiniarlutik minnerpaamik marloriarlutik qinnuteqartarsimagaluarput.

Kingullermik qinnuteqarsimanerup kingorna qaammatit arfineq-pingasut qaangiummata pappialat ombudsmandimit tiguneqarput, tamatumalu nalaani qinnuteqaammut suli isummertoqarsimanngilaq.

-Isumanga malillugu suliami taamatut ittumi, kommuni angerlatsitsinissamik qinnuteqaammut akuersaassanerluni, sapaatip akunnerisa arlaqanngitsut ingerlaneranni imaluunniit qaammatialunnguit ingerlaneranni isummersisimasussaangaluarpoq. Isornartoqartippara, meeqqap angajoqqaavisa inissiinissamut akuersissumminnik utertitsillutik allagaannut Qaasuitsup Kommuniata malitseqartitsisimannginnera, Ombudsmandi isornartorsiuilluni allappoq.

Inissiinerup qanoq sivisutiginissaanik naatsorsuutiginnissimannginneq

Kommuni K-p iliuusissatut pilersaarutit katillugit 17-it suliarisimavai. Iliuusissatulli pilersaarutinit 17-iusunit arfineq-marlunni inissiinerup qanoq sivisutiginissaanik naatsorsuutiginninneq ilanngunneqarsimanngilaq. Piffisami pineqartumi meeqqanit arfinilinnit angerlarsimaffiup avataanut inissinneqarsimasunit sisamat tassani pineqarput.

Kommuni isornartorsiorneqareerluni oqarsimavoq, inissiisarnerit qanoq sivisutiginissaannik naatsorsuutiginninnerit ilanngunneqartarsimannginnerat pisortat tullissaanik ataatsimiippata oqaluuserineqassasoq.

Ombudsmandip inerniliinermini akuersaarpaa, kommunip sulisussanik piginnaasalinnik sulisussarsiortarnermini unammilligassaqarnera, aamma aaqqissuussaanerusumik aqutsisut nakkutilliisarnissannik atuutsitsilerniarluni kommunip suliaqartarniminik annertusaasimanera, soorlu aamma isumaginninnermi siunnersortitut ilinniagalinnik marlunnik, angalasartussanik kommunip atorfinitsitsimanera akuersaaraa.